काठमाडौँ । नेकपा (एकीकृत समाजवादी) का अध्यक्ष माधवकुमार नेपालले वामपन्थी शक्ति मिलेर सरकार बनाउने कुरा अलमल्याउनलाई मात्र भनिएको बताउनुभएको छ । सोमबार पार्टीबाट निर्वाचित प्रतिनिधिसभा सदस्यलाई बधाई दिन आयोजित कार्यक्रममा उहाँले गठबन्धन छोडेर नभएको गठबन्धनमा जाँदा घर न घाटको हुनसक्ने बताउनुभयो ।
कसैले गैरवामपन्थी सरकार बनाउने कुरा गरेका छन् त्यो खयाली पुलाव मात्र हो भन्दै उहाँले भन्नुभयो, “कसैले वामपन्थीको सरकार बनाउने कुरा सोचिरहेको छ, त्यो पनि अलमल्याउने कुरामात्र हो । यस्ता कुरालाई सजिलो गरी पत्याउन सक्तैनौँ ।” भएकाको विश्वास गुमाउने अनि हुँदै नभएकाको विश्वास गरेर घर न घाटको हुने गल्ती गर्न नहुने उहाँको भनाइ थियो ।
अध्यक्ष नेपालले अहिले नै नेकपा (एमाले) सँग मेलमिलाप हुन सक्ने सम्भावना नरहेको संकेत गर्नुभयो । “एकातर्फ हामीले मित्रहरुको खोजी र पहिचान पनि गर्नुपर्छ भने अर्कोतिर मान्छेमा परिवर्तन र रुपान्तरण भइरहेको छ र आत्मालोचना देखिएको छ, साँच्चै सुध्रिएको अवस्था देखिएको छ भने आग्रह पालेर नबस्ने, यो दुईवटै कुरामा उत्तिकै ध्यान दिएर चल्नुपर्छ”, उहाँले भन्नुभयो ।
अध्यक्ष नेपालले अहिलेकै गठबन्धन कायम राख्ने भनेर संयुक्त वक्तव्य जारी गरिसकेकाले गठबन्धनकै सरकार बन्ने बताउनुभयो । “गठबन्धन हामी कायम राख्नेछौँ, गठबन्धन दलका नेताले सँगसँगै जाने संयुक्त वक्तव्य जारी गरिसकेका छौँ । गठबन्धनकै सरकार बन्ने आशा गरेका छौँ” अध्यक्ष नेपालले भने, ‘गठबन्धन दलका अरु पार्टी र पार्टीभित्रका नेताहरुमा अहंकार छ र उनीहरुलाई चाहिएको छैन भने जस्तो परिस्थिति आइलाग्छ, त्यसको सामना गर्न हामी तयार छौँ ।
” अध्यक्ष नेपालले आफ्ना सांसद तथा पार्टीका नेताहरुलाई बजारमा चलेका हल्लाको पछाडि नलाग्न आग्रह गर्नुभयो । बजारमा फैलिएका हल्लाको पछाडि नलागी सबै कुरामाथि गहिरो विश्लेषण गर्नुपर्छ भन्दै उहाँले भन्नुभयो, “भित्रभित्र चलिरहेका अनेक खेलहरु थाहा पाउन सक्नुुपर्छ । सबै कुराप्रति सजग हुनुपर्छ, तर हल्लाका पछि पनि जान भएन ।”
