एजेन्सी । कतार विश्वकपमा २०२२ ले आज विजेता पाउँदैछ । उपाधिका लागि दुई–दुई पटकका विश्वविजेता अर्जेन्टिना र फ्रान्सले प्रतिस्पर्धा गर्दैछन् ।
दुबै टिम आफ्नो तेस्रो उपाधि जित्नका लागि आतुर छन् । फाइनल खेल लुसेल रंगशालामा नेपाली समयानुसार ८ः४५ बजे सुरु हुनेछ । अर्जेन्टिनाको टोली ३६ वर्षपछि विश्वकपको उपाधि जित्न मैदान उत्रँदैछ ।
यस प्रतियोगितामा कप्तान लियोनल मेसीको निकै तारिफ भइरहेको छ । विश्वका सर्वकालीन महान खेलाडी मानिने मेसीले अहिलेसम्म ६ खेलमा पाँच गोल र तीन असिस्ट गरेका छन् । अर्जेन्टिनालाई फाइनल पुर्याउन मेसीको जति योगदान छ त्यति नै प्रशिक्षक लियोनल स्कालोनीको पनि छ । भलै उनी त्यति चर्चामा छैनन् ।
स्कालोनी त्यही व्यक्ति हुन् जसले मेसीलाई २०१६ मा अन्तर्राष्ट्रिय फुटबलबाट लिएको सन्यास फिर्ता लिन आग्रह गरेका थिए । कोपा अमेरिकामा टोलीको हारपछि मेसीले सन्यासको घोषणा गरेका थिए ।
राष्ट्रपति सहित अर्जेन्टिनाका सबैले उनलाई यो निर्णय फिर्ता लिन आग्रह गरे । मेसी सन्यासबाट फर्किए र २०१८ को विश्वकपमा टोलीको नेतृत्व गरे । प्रि–क्वाटरफाइनलमा फ्रान्ससँग अर्जेन्टिना पराजित भएपछि मेसी फेरि अन्तर्राष्ट्रिय फुटबल छाड्ने मनसायमा पुगे । उनलाई यो विश्वकपमा देखिने आंकलन त्यतिबेला गरिएको थिएन ।
यू–१७ टोलीका मुख्य प्रशिक्षक थिए स्कालोनी
२०१८ को विश्वकपपछि अर्जेन्टिनाले प्रशिक्षक जर्ज साम्पाओलीलाई बर्खास्त गर्यो । सन् २०१७ मा प्रशिक्षक नियुक्त भएका साम्पाओलीसँग पाँच वर्षको सम्झौता थियो तर एक वर्षपछि नै उनी बर्खास्तीमा परेका थिए ।
अर्जेन्टिनाले अन्डर १७ कोच लियोनेल स्कालोनीलाई जिम्मेवारी दिने निर्णय गर्यो । उनी ४० वर्षका थिए भने उनीसँग सिनियर टोलीलाई प्रशिक्षण दिने अनुभव थिएन । अनुभवी प्रशिक्षक बोलाउनुको सट्टा अर्जेन्टिनाले मुख्य टोलीको जिम्मेवारी तल्लो स्तरका प्रशिक्षकलाई सुम्पिएको थियो ।
स्कालोनी र मेसीले सँगै फुटबल खेले
लियोनल मेसीले २००५ मा अन्तर्राष्ट्रिय डेब्यु गर्दा स्कालोनी अर्जेन्टिनाको टोलीमा थिए । त्यतिमात्र नभई सन् २००६ मा मेसीले पहिलो विश्वकप खेल्दा स्कालोनी समेत टोलीमा थिए । स्कालोनीले सन् २०१५ मा व्यावसायिक फुटबलबाट सन्यास लिए । त्यसपछि उनी जर्ज साम्पाओलीसँगै सेभियाको टोलीमा सामेल भए । उनलाई सहायक प्रशिक्षक बनाइएको थियो । साम्पाओली सेभियाका मुख्य प्रशिक्षक थिए । यसपछि सन् २०१७ मा साम्पाओली अर्जेन्टिनाको प्रशिक्षक बने, स्कालोनी पनि उनीसँगै अर्जेन्टिनाको सहायक प्रशिक्षकमा रहे ।
साम्पाओलीलाई बर्खास्त गरेपछि अर्जेन्टिना फुटबल संघले पूर्व दिग्गज डिएगो सिमोनी, मार्सेलो गालार्डो र माउरिसियो पोचेटिनोलाई प्रशिक्षक नियुक्त गर्ने प्रयास गर्यो । साम्पाओलीलाई देखेर तीनै जनाले पद स्वीकार गर्न अस्वीकार गरे । अर्जेन्टिना फुटबल संघले एक अनौठो निर्णय गर्दै विदेशी प्रशिक्षक ल्याउनुको सट्टा यू–१७ टोलीका मुख्य प्रशिक्षक लियोनल स्कालोनीलाई जिम्मेवारी दियो ।
यस निर्णयको अर्जेन्टिनाका पूर्व दिग्गजहरूले विरोध गरेका थिए । दिवंगत डिएगो म्याराडोनाले पनि २०१८ मा भनेका थिए, ‘उनी ट्राफिकलाई निर्देशन दिन सक्दैनन्, उनले राष्ट्रिय टोलीलाई कसरी सम्हाल्ने ? के हामी सबै पागल भयौं ?’
आलोचनाबीच स्कालोनीले आफ्नो कोचिंग स्टाफको टोलीलाई सँगै राखे । उनीसँगै अर्जेन्टिनाका पूर्व स्टार खेलाडी पाब्लो आइमार, वाल्टर स्यामुएल र रोबर्टो आयला पनि सामेल भएका थिए । यसपछि स्कालोनीसामु सबैभन्दा ठूलो चुनौती लियोनल मेसीलाई मनाउनु थियो । उनी अन्तर्राष्ट्रिय फुटबल खेल्न चाहँदैनथे ।
स्कालोनीले मेसीलाई ह्वाट्सएप सन्देश पठाए । उनले लेखे, ‘हेलो लियो, म स्कालोनी हुँ । हामी तपाईंसँग पाब्लो आइमारसँग कुरा गर्न चाहन्छौं ।’ मेसी बाल्यकालमा आइमरलाई आफ्नो आदर्श मान्ने गर्थे । उनी सिनियर खेलाडीलाई पनि सम्मान गर्थे । त्यसैले यो सन्देश पछि उनी स्कालोनी र एमरलाई भेट्न गए । त्यसपछि तीनैबीच छलफल भयो र मेसी खेल्न राजी भए ।
स्कालोनीले पछि ईएसपीएनसँग भनेका थिए – ‘मेसीले हामीलाई आफू फर्कन तयार रहेको बताए । हामीले बोलाएमा उनी खेल्न तयार छन् । मेसी आफ्नो अन्तर्राष्ट्रिय करियर विस्तार गर्न मात्रै नभई आफूले पहिले जित्न नसकेका प्रतियोगिताहरू पनि जित्न चाहन्थे ।’
तीन कोपा अमेरिका र एक विश्वकपको फाइनलमा पराजित भएपछि स्कालोनीले टोली परिवर्तन गर्ने विचार गरे । स्कालोनीले मेसीको काँधबाट बोझ हटाए र टोलीमा नयाँ खेलाडीहरू ल्याए । मेसी बिना उक्त टोलीले पहिलो छ मध्ये चार मैत्रीपूर्ण खेल जित्यो । २०१९ मा कोपा अमेरिकाको सेमिफाइनलमा ब्राजिलसँग पराजित भएपछि अर्जेन्टिनाले उत्कृष्ट पुनरागमन गरेको थियो ।
अर्जेन्टिनाले २०२१ को कोपा अमेरिका कप जितेको थियो । जितसँगै मेसीको पहिलो सपना साकार भयो । उनी अर्जेन्टिनाबाट पहिलो पटक अन्तर्राष्ट्रिय प्रतियोगिता जित्न सफल भए। अर्जेन्टिनाले २८ वर्षपछि पहिलो पटक ठूलो उपाधि जितेको थियो । स्कालोनीको टोली लगातार ३६ खेलमा अपराजित रह्यो । विश्वकपमा साउदी अरेबियाविरुद्धको खेलमा उसको यो क्रम तोडिएको थियो । यो पराजयपछि स्कालोनीले रणनीति परिवर्तन गरे । जसकारण नेदरल्यान्ड्स–क्रोएसिया जस्ता बलियो टोलीलाई हार चखाएको अर्जेन्टिना विश्वकपको उपाधि उचाल्न एक कदममात्रै पछि छ ।
