एजेन्सी । कतारमा जारी फिफा विश्वकपमा तीन दिनभित्र दुई पत्रकारको मृत्यु भएको छ । मंगलबार कतारका फोटो पत्रकार खालिद–अल–मिस्लामको मृत्युको खबर सार्वजनिक भएको छ ।
स्थानीय सञ्चारमाध्यमका अनुसार खालिद कतारको अल कास टिभीका लागि काम गरिरहेका थिए ।
यसअघि शनिबार अमेरिकी पत्रकार ग्रान्ट वालको मृत्युको खबर बाहिर आएको थियो । समलिङ्गी समुदायको समर्थनमा इन्द्रेणी शर्ट लगाएका उनलाई स्थानीय प्रहरीले नियन्त्रणमा लिएको थियो र केही दिनपछि वालको मृत्यु भएको खबर आयो ।
यद्यपी खालिदको मृत्युको कारण भने खुल्न सकेको छैन । उनको मृत्युको खबर पहिलो पटक स्थानीय समाचार एजेन्सी गल्फ टाइम्सले दिएको थियो । त्यहाँ लेखिएको छ – ‘फिफा विश्वकप कभर गर्ने क्रममा खालिदको अचानक निधन भयो । उहाँको परिवारप्रति गहिरो समवेदना व्यक्त गर्दछौं ।’
अल कास टिभीले पनि प्रत्यक्ष प्रसारणमा समाचारको पुष्टि गर्दै थप विवरणको लागि पर्खिरहेको बताएको छ । ४८ घण्टाअघि लुसेल स्टेडियममा अर्जेन्टिना र नेदरल्याण्ड्सबीचको क्वार्टरफाइनल खेल कभर गर्ने क्रममा अचानक लडेर अमेरिकी पत्रकार ग्रान्ट वालको मृत्यु भएको खबर आएको थियो ।
