दाइजो नदिएको निहुँमा आफ्नी श्रीमतीलाई यातना दिई घर निकाला गरेको आरोपमा डा पंकज चौधरी पक्राउ परेका छन् । मंगलबार साँझ महोत्तरीको रामगोपालपुर नगरपालिका–५ का ३५ वर्षीय पंकजलाई पक्राउ गरिएको प्रहरीले जनाएको छ ।
प्रहरीका अनुसार पंकजकी श्रीमती नेहा चौधरीले दाइजोविरुद्ध दिएको जाहेरीका आधारमा उनलाई पक्राउ गरिएको हो । नेहाले यसअघि गत कात्तिक ४ गते जिल्ला प्रहरी कार्यालय महोत्तरीमा घरेलु हिंसासम्बन्धी उजुरु दर्ता गराएकी थिइन् । त्यतिबेला पनि प्रहरीले पंकजलाई तीन दिन थुनेको थियो ।
प्रहरीले दाइजोविरुद्धको कसुरमा कारबाही चलाउन अनुसन्धान गरिरहेको जनाएको छ । अहिले पंकज जिल्ला प्रहरी कार्यालय महोत्तरीको हिरासतमा छन् ।
पंकज र नेहाबीच तीन वर्षको प्रेमपछि गत फागुनमा विवाह भएको थियो । नेहा महोत्तरीकै औरही नगरपालिका–१ की बासिन्दा हुन् । उक्त विवाहमा नेहाको परिवारले नगद र सुनचाँदी गरी एक करोड २५ लाख खर्च गरेको बताइएको छ ।
तर विवाह भएको चार महिनापछि नै पंकज र नेहाबीच खटपट सुरु भएको थियो । नेहाका अनुसार पंकजले काठमाडौँमा घर किनिदिन भन्दै कुटपिट र यातना दिँदै आएका थिए ।
