ललितपुरः ललितपुर महानगरपालिका वडा १८ मा रहेको ऐतिहासिक मगरगाउँमा स्थानीय मगर समुदायको सक्रियतामा मगर स्तम्भ निर्माण गरिएको छ ।
स्तम्भले मगर समुदायको ऐतिहासिक तथ्यलाई समेटेको छ । उक्त स्तम्भ जलविनायक मगर गुठीले निर्माण गरी मगरगाउँ पिपलबोट चोकमा स्थापना गरिएको छ ।
नेपाल एकीकरणको सिलसिलामा सन् १७६९ मा पृथ्वी नारायण शाहले काठमाडौं उपत्यका विजय गरेपछि रणनैतिक दृष्टिकोणले काठमाडौं उपत्यकालाई अन्य राज्यहरुको आक्रमणबाट जोगाउन एकीकरण अभियानमा उनलाई महत्वपूर्ण सहयोग गरेका साहसी र बहादुर मगर जातिलाई उपत्यका छिर्ने गौंडा कुर्न उपत्यकाका विभिन्न स्थानहरुमा जग्गा दिई बसोबास गराएको स्तम्भमा लेखिएको छ ।
साथै, गोरखा जिल्ला पिपलथोक थातथलोका जगजजित थापा मगरको नाउँमा ५०० रोपनी जग्गा लालमोहर लगयाई सैंबु, मगरगाउँमा बसाइएको इतिहास छ ।
मगर स्तम्भको वडा नं. १८ का वडा अध्यक्ष दामोदर खड्काले बिहीबार एक समारोहबीच अनावरण गर्नुभयो । त्यस अवसरमा उहाँले मगर स्तम्भले इतिहासलाई चिनाउने काम गरेको र यसबाट समुदायले नै गर्वको अनुभूति गरेको छ भन्नुभयो ।
गुठीका अध्यक्ष एवं स्तम्भ निर्माण समितिका संयोजक शंकर थापा मगरले यहाँका मगर समुदायको पहिचान मेटिने अवस्था सिर्जना भएपछि गुठीले आफ्नै खर्चमा स्तम्भ निर्माण गरेको बताउनुभयो । उहाँले स्तम्भ निर्माणमा सहयोग गर्ने सबैप्रति कृतज्ञता ज्ञापन गर्नुभयो ।
गुठीका कोषाध्यक्ष रबिन्द्र थापा मगर र सल्लाहकार नरेश थापा मगरले मगर स्तम्भ निर्माण गर्ने सोच १०–११ वर्षदेखि आएको भए पनि अहिले त्यो सार्थक भएकामा प्रसन्नता व्यक्त गर्नुभयो । सल्लाहकार नरेश थापा मगरले पृथ्वी नारायण शाहका पालामा एक दुई घर भए पनि अहिले यस गाउँमा ५१ घरपरिवार मगर पुगिसकेको बताउनुभयो ।
त्यस अवसरमा मगर समुदायबाट विद्यावारिधि गरेका डा मधुसुदन थापा मगरलाई सम्मान गरिएको थियो ।
