काठमाडौं । नेपाल राष्ट्र बैंक विराटनगर कार्यालयले प्रदेश नं १ अन्तर्गतका १४ जिल्लाको स्थलगत तथा गैरस्थलगत भ्रमण गरी आर्थिक वर्ष २०७८/७९ को आर्थिक गतिविधिसम्बन्धी वार्षिक प्रतिवेदन तयार गरेको छ ।
प्रतिवेदनमा आर्थिक वर्ष २०७८/७९ मा प्रदेश नं १ को कृषि, उद्योग, सेवा, पूर्वाधार, रोजगारी तथा सरकारी वित्तलगायतका क्षेत्रको यथार्थ अवस्था र अघिल्लो वर्षको तुलनामा भएको परिवर्तनको अध्ययन तथा विश्लेषण गरिएको छ ।
केन्द्रीय तथ्यांक विभागका अनुसार आर्थिक वर्ष २०७७/७८ मा प्रदेश नं १ को आर्थिक वृद्धिदर ३.८८ प्रतिशत रहेकामा आर्थिक वर्ष २०७८/७९ मा उक्त वृद्धिदर ५.०९ प्रतिशत रहने अनुमान गरिएको प्रतिवेदनमा उल्लेख छ ।
त्यस्तै समीक्षा अवधिमा मुलुकको कृषि क्षेत्रको कूल उत्पादनमा प्रदेश नं १ को हिस्सा २१.८ प्रतिशत, उद्योग क्षेत्रको उत्पादनमा १९.६ प्रतिशत र सेवा क्षेत्रमा १२.५ प्रतिशत योगदान रहने अनुमान गरिएको छ । अघिल्लो वर्ष कृषि, उद्योग र सेवा क्षेत्रमा प्रदेश नं १ को हिस्सा क्रमशः २१.७ प्रतिशत, १९.६ र १२.५ प्रतिशत रहेको थियो ।
त्यस्तै प्रदेशगत आर्थिक वृद्धिका आधारमा आर्थिक वर्ष २०७८/७९ को आर्थिक वृद्धिदर उपभोक्ता मूल्यमा ५.४१ प्रतिशत रहने अनुमान गरिएको छ । अघिल्लो वर्षको सोही अवधिमा यस प्रदेशको आर्थिक वृद्धि दर ४.३४ प्रतिशत रहेको थियो ।
२०७८ सालको जनगणनाको प्रारम्भिक प्रतिवेदनअनुसार नेपालको कूल जनसंख्याको १७।०३ प्रतिशत हिस्सा रहेको यस प्रदेशको वार्षिक जनसंख्या वृद्धि दर ०.८८ प्रतिशत रहेको छ । पछिल्लो जनगणनाअनुसार प्रदेश नं १ को जनघनत्व १९२ प्रतिवर्ग किलोमिटर रहेको छ । त्यस्तै प्रतिपरिवा औसद सदस्य संख्या ४.१३ रहेको छ । अघिल्लो आर्थिक वर्षमा यो आँकडा ४.५७ थियो ।
