काठमाडौँ । प्रतिनिधिसभामा धादिङ क्षेत्र नं १ बाट निर्वाचित सांसद राजेन्द्र पाण्डेले बागमती प्रदेशका मुख्यमन्त्रीका रुपमा पनि काम गरिरहनुभएको छ ।
यतिबेला पाण्डेले दुई ओटा पदको प्रतिनिधित्व गरिरहनुभएको छ । संवैधानिक कानूनका जानकार वरिष्ठ अधिवक्ता टीकाराम भट्टराईले पाण्डेको यो कार्य गलत भएको बताउनुभयो । भट्टराईले न्यूजपोलारसँग भन्नुभयो, “यो मुख्यतः नैतिक कुरा हो साथै संवैधानिक हिसाबले पनि अनुपयुक्त छ ।”
प्रतिनिधिसभामा निर्वाचित भएपछि उहाँले मुख्यमन्त्री छाड्नु पर्ने उहाँको सुझाव छ । भट्टराईले भन्नुभयो, “एउटै व्यक्तिले दुई निकायको प्रतिनिधित्व गर्नु उपयुक्त हुँदैन ।”
पाण्डे नेकपा (एकीकृत समाजवादी) का तर्फबाट धादिङ क्षेत्र नं १ बाट प्रतिनिधिसभा सदस्यमा निर्वाचित हुनुभएको छ ।
