धनगढी । धनगढीमा ग्रेडरको ठक्करबाट ज्यान गुमाएकी १५ वर्षीया बालिका चेतना साउदको शव परिवारले बुझेको छ ।
जिल्ला प्रहरी कार्यालयले बालिकालाई ठक्कर दिने ग्रेडरका चालक भरतपुर महानगरपालिका-२८ का २७ वर्षीय बिकल कुमालविरूद्व किटानी जाहेरी दर्ता गरेपछि पीडित परिवारले शव बुझेका हुन् ।
चालकविरूद्व किटान जाहेरी दर्ता भएर अदालतबाट ४ दिन म्याद थप गरिएपछि परिवारले शव बुझेको जिल्ला प्रशासन कार्यालयका सूचना अधिकारी शिवराज जोशीले बताए । मृतकको शव सेती प्रादेशिक अस्पतालमा परीक्षण गरेपछि परिवारलाई जिम्मा लगाएको हो ।
धनगढीको हसनपुर पिपलचौतारा सडकखण्ड कालोपत्रे गर्ने क्रममा कालिका कन्सट्रक्सनको ना १ क ९७५ नम्बरको ग्रेडरले साइकलमा विद्यालय गइरहेकी साउदलाई ठक्कर दिदा घटनास्थलमा नै मृत्यु भएको थियो ।
पञ्चोदय माध्यमिक विद्यालयमा अध्ययनरत साउदको मृत्यु भएपछि सो विद्यालयका विद्यार्थीहरुले बिहीबार दिनभर धनगढीमा प्रदर्शन गरेका थिए । स्थितिलाई नियन्त्रणमा लिन जिल्ला प्रशासन कार्यलय कैलालीले निषेधाज्ञा जारी गरेको थियो ।
विद्यार्थीहरु निषेधाज्ञा तोडेर प्रदर्शनमा उत्रिएपछि परिस्थिति नियन्त्रणमा लिन प्रहरीले अश्रुग्यास प्रहार गरेपछि शुक्रवार धनगढीको स्थिति तनावग्रस्त बनेको थियो ।
