काठमाडौँ । सफल चलचित्र ‘प्रेमगीत ३’ हिन्दी भाषामा डब भएर भारतका विभिन्न हलमा प्रदर्शन भएपछि निर्देशक तथा निर्माता सन्तोष सेन र सो फिल्मका अभिनेता प्रदीप खड्का भारतसँग नजिकिएका छन् ।
निर्वाचनअघि दुवै जना केही हप्ता भारत बसेर फर्किएका थिए । चुनाव सकिएपछि फेरि उनीहरु भारत गए । यतिबेला उनीहरु गोवामा छन् । ‘प्रेमगीत ३’ भारतमा रिलिजपछि दुवैको बलिउडकर्मीसँग पनि निकटता बढेको छ ।
यसैबीच, शनिबार गोवामा सन्तोष र प्रदीपले बलिउडका चर्चित अभिनेता नाना पाटेकरसँग भेट गरेका छन् । पाटेकरकै घरमा उनीहरुको भेट भएको हो । निर्माता सेनले एक प्रोजेक्टको विषयमा कुराकानी गर्नका लागि भेट भएको जानकारी दिए ।
अभिनेता पाटेकरले सन्तोष र प्रदीपलाई आफ्नै निवासमा बोलाएका थिए । त्यसक्रममा उनलाई फिल्मको कथा सुनाइएको थियो । भेटको क्रममा प्रदीपले पाटेकरलाई ‘प्रेमगीत ३’को ट्रेलर पनि देखाएका थिए । चाँडै नै प्रदीपले बलिउड फिल्म साइन गर्न सक्ने संकेत पनि सेनले गरे । अहिले प्रदीपले स्क्रिप्ट पढिरहेको सन्तोष बताउँछन् ।
