कैलाली । नेकपा (एमाले) का सचिव तथा एमाले सुदूरपश्चिम इन्चार्ज लेखराज भट्टलाई ज्यान लिने धम्की आएको छ ।
पूर्वमन्त्रीसमेत रहेको भट्टलाई उनको घरमा दुई अज्ञात व्यक्ति पुगेर ज्यान लिने धम्की दिएका हुन् । मंगलबार बिहानै गोदावरी नगरपालिका अत्तरियास्थित निवासमा घुसेर ती दुई व्यक्तिले त्यस्तो धम्की दिएका हुन् ।
निवासमा भट्ट र परिवारका कुनै पनि सदस्य नभएका बेला धम्की दिएको भन्दै नेता भट्टले प्रहरीसमक्ष सुरक्षा माग गरेका छन् ।
उनका अनुसार बिहान ८ बजेतिर आफू घर नभएको बेला ‘त्यस मन्त्रीलाई ठिक पार्छौं’ भन्दै उनीहरुले धम्की दिएका हुन् । “म धनगढीमा रहेको बेला घरमा त्यस्तो घटना भएछ, मैले प्रहरी प्रशासनसँग सुरक्षा माग गरेको छु”, उनले भने ।
