दाङ । नेकपा (एमाले) का कार्यकर्ताहरुले दाङमा आएका शहरी विकास मन्त्रालयका सचिव डा रमेश सिंहसहितको टोलीलाई घेराउ गरेका छन् ।
निर्वाचनको मुखमा शहरी विकासमन्त्री मेटमणि चौधरीलाई भेट्न आएपछि सचिवसहितको टोलीलाई एमाले कार्यकर्ताहरुले घेराउ गरेका हुन् । चौधरी दाङ निर्वाचन क्षेत्र नं १ बाट प्रतिनिधिसभा उम्मेदवार हुनुहुन्छ ।
एमाले कार्यकर्ताहरुले सचिव सिंहमाथि निर्वाचनमा मन्त्री चौधरीलाई सघाउन आएको आरोप लगाएका छन् । एमालेको युवा संगठन राष्ट्रिय युवा संघका कार्यकर्ताहरुले राति सचिव सिंहसहितको टोली बसेको होटलमा घेराउ गरेका हुन् । होटल घेराउ गरेपछि प्रहरीले राति साढे १ बजे नै कडा सुरक्षाका बीच मन्त्रालयका सचिवको टोलीलाई उद्धार गरेको थियो ।
सचिव सिंहसहितको टोली राति १ः३० बजे नै होटलबाटै बाहिरिएको थियो । एमाले कार्यकर्ताहरुले निर्वाचनमा मन्त्री चौधरीलाई जिताउन आर्थिक चलखेल गरेर मतदातालाई प्रभावित बनाउन खोजेको आरोप लगाएका छन् ।
तर मन्त्री चौधरीका स्वकिय सचिव नारायण शर्माले सचिव सिंह अवकाश हुन लागेकाले मन्त्रीसँग विदाइ हुन दाङमा भेट्न आएको बताएका छन् ।
