ताजा जनादेशका लागि संसद् विघटन गरेको हो, प्रतिगमनका लागि होइन– ओली(फोटो फिचर)

काठमाडौँ । नेकपा (एमाले)का अध्यक्ष केपी शर्मा ओलीले सरकारलाई सहजरुपमा चलाउन नदिएपछि ताजा जनादेश लिन संसद् विघटन गरेको बताउनुभएको छ ।

आइतबार कालिकोटको रास्कोटमा आयोजित चुनावी सभामा उहाँले संसद विघटनलाई जनतामाझ सही नै भएको अर्थ्याउँदै ताजा जनादेशका लागि त्यो बाटोमा हिँड्नुपरेको भनाइ राख्नुभयो ।

नेकपा (माओवादी केन्द्र)का अध्यक्ष पुष्पकमल दाहाल प्रचण्ड दक्षिणपन्थीको शरणमा पुगेपछि ताजा जनादेशका लागि संसद् विघटन गर्नुपरेको उल्लेख गर्दै अध्यक्ष ओलीले जनताले चाहेको कुरालाई विरोधीले प्रतिगमन भनेको बताउनुभयो ।

उहाँले उल्टै गठबन्धनले प्रतिगमन गरेको आरोप लगाउँदै भन्नुभयो, “ ‘हामीले राष्ट्रिय हितका विषयमा शिर झुकाएर कुरा गरेनौँ, एमालेले प्रतिगमन गर्यो रे रु माओवादीलाई साथमा लिएर ३६ सिट जितायौँ, तर सहमतिलाई तोडे, दक्षिणपन्थी शक्तिसँग मिलेर सरकार टुटाउने काम गरे, जहिले नक्कली कुरा गरे ।”

केही दिनअघि रास्कोट आएर प्रचण्डले आफूलाई प्रतिगमन गरेको आरोप लगाएको जवाफ दिँदै ओलीले भन्नुभयो, “कांग्रेसका पछाडि लागेर रास्कोट आएर प्रतिगमन गर्यो रे, मैले प्रतिगमन गर्ने काम कहिल्यै गरिनँ ।”