काठमाडौँ । आगामी मंसिर ४ गते हुने प्रतिनिधिसभा र प्रदेशसभा सदस्यको निर्वाचनमा नेकपा (एमाले) लाई सघाएको आरोप लगाउँदै गण्डकी प्रदेश सरकारका एक मन्त्रीलाई हटाउने तयारी गरिएको छ ।
प्रदेशका ऊर्जा तथा सिँचाइमन्त्री हरिशरण आचार्य मन्त्रीकै हैसियतमा एमालेको प्रचारमा बागलुङलगायतका जिल्लामा समेत सक्रिय रहेको पाइएपछि पार्टी उनलाई उनकै पार्टीको निर्देशनमा हटाइन लागिएको बताइएको छ ।
विसं २०७४ को निर्वाचनमा नेपाली कांग्रेसको समर्थनमा गोरखा निर्वाचन क्षेत्र नं २ को १ बाट आचार्य बाबुराम भट्टराई नेतृत्वको तत्कालीन संघीय समाजवादी पार्टीबाट प्रदेशसभामा विजयी भएका थिए ।
आसन्न निर्वाचनमा उनलाई टिकट नदिएर प्रदेशसभामा फणिन्द्र देवकोटालाई उम्मेदवार बनाइएपछि उनी असन्तुष्ट रहेका थिए । देवकोटा नेकपा (माओवादी केन्द्र) को चुनाव चिह्नबाट उम्मेदवार बनेका हुन् ।
पार्टीका आधिकारिक उम्मेदवार देवकोटाविरुद्ध मन्त्री आचार्यले बागी उम्मेदवारी दिएका थिए । तर उनले आफ्नो उम्मेदवारी फिर्ता लिएका थिए । आसन्न निर्वाचनमा गठबन्धनका उम्मेदवारलाई हराउन एमालेसँग साँठगाँठ गरेको उनीमाथि आरोप लगाइएको छ । मुख्यमन्त्री कृष्णचन्द्र नेपाली पोखरेलले आचार्य मन्त्रीलाई हटाउन प्रदेश प्रमुखलाई पत्र पठाउने तयारी गरेको बताइएको छ ।
