कोलम्बो । बलात्कार आरोप लागेका क्रिकेटर दानुष्का गुणातिलकेलाई श्रीलंकन क्रिकेट बोर्डले निलम्बन गरेको छ । आइतबार टी-२० विश्वकप खेल्न अस्ट्रेलिया पुगेका गुणातिलकेलाई अस्ट्रेलियन प्रहरीले उनी बसिरहेको होटलबाट पक्राउ गरेको थियो ।
२९ वर्षीया महिलाले उनीमाथि बिना सहमति यौनसम्पर्क गरेको आरोप लगाएकी छन् । ती महिलाले गुणातिलकेलाई डेटिङ एपमार्फत भेटेको बताइएको छ ।
मिडिया रिपोर्टका अनुसार बलात्कारको घटना यस हप्ताको सुरुमा सिड्नीको एक निवासमा भएको थियो । राति होटलबाट पक्राउ परेका उनलाई आज अदालतमा पेश गरिने छ ।
श्रीलंकाको टोलीको टी–२० विश्वकप यात्रा छनोटअन्तर्गत सुपर–१२ सम्म रह्यो । श्रीलंकाले समुह लिगमा ५ खेलमध्ये २ खेल जित्यो भने ३ खेलमा हार ब्यहोर्यो । चोटका कारण जारी विश्वकपको पहिलो चरणबाटै टिमबाहिर रहेका गुणातिलके स्वदेश भने फर्किएका थिएनन्।
श्रीलंकन बोर्डले आफूले पनि छानबिन गर्ने र दोषी देखिए कारबाही गर्ने जनाएको छ ।
