काठमाडौँ । भारत सरकारले नेपाललाई उपहारस्वरुप २०० वटा सवारी साधन दिएको छ । आसन्न निर्वाचनका लागि आवश्यक प्रबन्धलाई थप व्यवस्थित गर्न सहयोग पुर्याउन ती सवारी साधन दिइएको नेपालस्थित भारतीय राजदूतावासले जनाएको छ ।
नेपाल सरकारको अनुरोधमा उपलब्ध गराइएको यी सवारी साधन निर्वाचनका दौरान प्रयोग गरिने छ । राजदूतावासका अनुसार १२० सवारी साधन सुरक्षा निकायले र बाँकी ८० वटा निर्वाचन आयेगले प्रयोग गर्नेछन् ।
मंगलबार आयोजित एक कार्यक्रममा नेपालका लागि भारतीय राजदूत नवीन श्रीवास्तवले अर्थमन्त्री जनार्दन शर्मालाई ती सवारी साधन हस्तान्तरण गर्नुभयो । सो अवसरमा अर्थमन्त्री शर्माले यी सवारी साधन उपहारसहित नेपालसँगको विकास साझेदारीमा निरन्तर सहयोग गरेकोमा भारत सरकार र जनतालाई धन्यवाद दिनुभयो ।
निर्वाचन सञ्चालनका लागि नेपालका विभिन्न संस्थाको लजिस्टिक प्रबन्धलाई थप मजबुत बनाउन यी सवारी साधन उपयोगी साबित हुने विश्वास भारतीय राजदूतावासले लिएको छ।भारत सरकारले विगतका वर्षहरुमा पनि नेपाल सरकारको अनुरोधबमोजिम निर्वाचन आयोग र नेपालको सुरक्षा निकायलाई उपयोग गर्नका लागि सवारी साधनका रुपमा सहयोग गर्दै आएको छ ।
हालसम्म नेपाल प्रहरी र सशस्त्र प्रहरीलाई करिब दुई हजार र नेपाली सेना र निर्वाचन आयोगलाई करिब चार सय सवारी साधन गरी निर्वाचनमा सहयोग गर्न उपहार दिइएको राजदूतावासले जनाएको छ ।
दूतावासले एक विज्ञप्ति जारी गर्दै भारत र नेपालले बहुआयामिक र बहुक्षेत्रीय विकास साझेदारीले दुवै देशका जनताको निकटता झल्काउने बताएको छ। यी लजिस्टिक प्रावधानहरूको विस्तारले भारत सरकारको जनतासँगको सम्बन्धको विकासमा योगदान पुर्याउने निरन्तर सहयोगलाई झल्काउने विज्ञप्तिमा उल्लेख छ।
