दाङ निर्वाचन क्षेत्र नम्बर १ मा नेकपा (एमाले)का दुई महिला सदस्यबीच भिडन्तको स्थिति देखिएको छ ।
एमालेकी निवर्तमान सांसद गंगा चौधरी सत्गौवाले उम्मेदवारी दर्ता गराएपछि यहाँको राजनीति थप गर्मिएको छ । गंगाले स्वतन्त्रबाट उम्मेदवारी दर्ता गराउनु भएको छ ।
एमालेको तर्फबाट दाङ क्षेत्र नम्बर १ मा निवर्तमान सांसद शान्ता चौधरीले आधिकारिक उम्मेदवारी दर्ता गराउनु भएको छ ।
पार्टीले टिकट नदिएपछि गंगाले उम्मेदवारी दिने घोषणा गर्नु भएको थियो । उम्मेदवारी दिएपछि एमालेको केन्द्रीय सदस्यबाट राजीनामा दिने पनि उहाँले यसअघि नै घोषणा गरिसक्नु भएको छ ।
हुनत, यसअघि गंगालाई दाङ १ बाट प्रतिनिधिसभा सदस्यका लागि सिफारिस गरिएको थियो । तर दाङ २ की स्थायी बासिन्दा शान्ता चौधरी एमाले उम्मेदवार बनेपछि गंगा चौधरीले बागी उम्मेदवारी दिनु भएको हो ।
गंगा थरुहट आन्दोलनबाट राजनीतिक चर्चामा आउनु भएको हो । २०७४ सालको प्रतिनिधिसभा निर्वाचनमा उहाँ समानुपातिकतर्फबाट निर्वाचित हुनु भएको थियो ।
