काठमाडौँ । पाँच वर्ष अघि बीबीसीको साझा सवाल कार्यक्रममा प्रधानमन्त्री शेरबहादुर देउवाले झपारेर चर्चामा आएका गुल्मीका सागर ढकालले प्रतिनिधिसभा सदस्यका लागि डडेल्धुराबाट उम्मेदवारी दर्ता गराएका छन् ।
प्रधानमन्त्री एवं नेपाली कांग्रेसका सभापतिविरुद्ध उनले उम्मेदवारी दिएका हुन् । डडेल्धुरा प्रधानमन्त्रीको गृहजिल्ला पनि हो । देउवाले अहिलेसम्म सो क्षेत्रबाट पराजित हुनुपरेको छैन ।
ढकालले ट्विट गर्दै डडेल्धुरामा विधिवत्रुपमा उम्मेदवारी दिएको जानकारी गराएका छन् । उनले उग्रतार, घटाल, परशुराम बाबालगायत देवी देवतालाई साक्षी राख्दै डडेल्धुरा र देशवासीलाई नयाँ आशा, विश्वास र विकासका लागि लागि २ दिनको निराहार व्रत बस्ने निर्णय गरेको समेत बताएका छन् ।
