काठमाडौं । वडादसैंको अवसर पारेर इ–आर्ट्स नेपालले आयोजना गरेको हिमालयन आर्ट फेस्टिभल सकिएको छ ।
सन् २०१७ देखि सुरु गरिएको प्रदर्शनीको पछिल्लो पाँचौं संस्करणमा १३० भन्दा बढी कलाकारको कलाकृति प्रस्तुत गरिएको थियो । नेपाल कला परिषद्, बबरमहलमा आयोजित कला महोत्सवमा नेपालको कला परिदृष्यको बारेमा चेतना जगाउने र नेपाली लगानीकर्तालाई कलामा लगानी गर्न प्रोत्साहित गर्ने लक्ष्य राखिएको थियो ।
महोत्सवमा बरिष्ठ देखि हालको पुस्ताका नेपाली कलाकारहरुको कलाकृतिहरु प्रस्तुत गरिएको थियो । चार दिने प्रदर्शनीमा चित्रकलाका साथै मूर्तिकला, इन्स्टलेसन आर्ट, एचिङ्ग तथा परम्परागत पौभा कला, फोटोग्राफीहरुलाई समावेश गरिएको थियो ।
प्रदर्शनीमा कलाकारहरुमा शशी शाह, किरण मानन्धर, शशिकला तिवारी, हरिप्रसाद शर्मा, कृष्ण मानन्धर, राजन काफ्ले, भुवन थापा, आशा डंगोल, इरिना ताम्राकार, बृहस्पति प्रधान, विधाता केसी, सागर मानन्धर, उदय बज्राचार्य, सविता डंगोल र इशान परियारका सृजनाहरु राखिएका थिए ।
प्रदर्शनीमा वरिष्ठ कलाकार हरिप्रसाद शर्माका चित्रहरू विशेष कलाकृतिका रूपमा प्रदर्शन गरिएको थियो । वरिष्ठ कलाकार शर्माको चित्रकलालाई विशेष रुपमा प्रदर्शनी गर्दै उहाँको कलायात्रा, कला सिर्जना अन्तरगत काठमाडौंको सामाजिक, सांस्कृतिक इतिहासलाई जीवन्त रुपमा चित्रमा उतारिएको लुम्बिनीको अशोक स्तम्भ जस्ता धार्मिक कथन र ऐतिहासिक पक्षलाई समेत समेटिएको कला प्रर्दशन गरिएको थियो ।
