काठमाडौँ । नेपाल प्रहरीले लाल मोहम्मद हत्या प्रकरणमा तीन जनालाई पक्राउ गरेको छ । काठमाडौँको गोठाटारमा महोम्मदको गोली हानी हत्या गरिएको थियो । प्रहरीका अनुसार पक्राउ परेका तीनै जना हतियार व्यवस्थापक हुन् ।
यही असोज ४ गते बेलुका भएको हत्यामा संलग्न भएको आरोपमा प्रहरीले दुई पुरुष र एक महिलालाई पक्राउ गरेको हो । प्रहरीले तीनै जनाले मोहम्मदको हत्याका लागि हतियार व्यवस्थापनमा सहयोग पुर्याएको बताएको छ ।
घटनामा संलग्न महिला यसअघि लागुऔषधसम्बन्धी मुद्दामा जेलसमेत बसेको प्रहरीले बताएको छ । प्रहरीले तीन जना पक्राउ परेको बारे जानकारी दिन पत्रकार सम्मेलन गर्ने तयारी गरेको समाचार छ ।
गोठाटारको एक गार्मेन्ट फ्याक्ट्री अगाडि बेलुकीको समयमा मोटरसाइकलमा आएका तीनमध्ये एक व्यक्तिले मोहम्मदलाई अगाडिबाट गोली हानी हत्या गरेका थिए । सो घटनाबारे प्रहरी प्रधान कार्यालयले विशेष समिति बनाएर अनुसन्धान गरिरहेको छ ।
