काठमाडौँ । जनता समाजवादी पार्टी (जसपा) ले मधेश प्रदेशमा राष्ट्रपति विद्यादेवी भण्डारीको राजीनामा माग गर्दै चरणबद्ध आन्दोलनको घोषणा गरेको छ ।
जसपाले नागरिकता विधेयक प्रमाणीकरण नगरेको भन्दै राष्ट्रपतिको राजीनामा माग गरेको हो । संसद्को दुवै सदनबाट पारित भई प्रमाणीकराण्का लागि राष्ट्रपतिकहाँ पुगेको सो विधेयक राष्ट्रपति भण्डारीले मंगलबार प्रमाणीकरण गर्न अस्वीकार गर्नुभएको थियो ।
जसपाले राष्ट्रपतिको संवैधानिक व्यवस्थाबमोजिम सो विधेयक प्रमाणीकरण नगरेपछि उहाँको राजीनामा माग गर्दै चरणबद्ध आन्दोलनको घोषणा गरेको हो ।
शनिबारदेखि जसपाले शान्तिपूर्ण आन्दोलन गर्ने जनाएको छ । पार्टीले बुधबार र बिहीबार पनि मधेश प्रदेशका आठ वटै जिल्लामा राष्ट्रपति भण्डारीको पछिल्लो कदमप्रति विरोध गरेको थियो ।
आन्दोनका कार्यक्रमअनुसार असोज ८ गते जिल्ला सदरमुकाममा राष्ट्रपति भण्डारीको कदमका बारेमा नागरिक समाजलगायतसँग अन्तरक्रिया गर्ने रहेको छ । त्यस्तै असोज ११ गते पार्टीका भ्रातृ संगठनले राष्ट्रपति विरुद्ध प्रदर्शन गर्ने र पुत्ला दहन गर्ने, असोज १३ गते पालिका र वडास्तरमा अन्तरक्रिया गर्ने कार्यक्रम रहेको छ ।
