काठमाडौं । प्रतिनिधि सभाका सभामुख अग्निप्रसाद सापकोटा र उपसभामुख पुष्पा भुसालको पद खाली गर्न माग गर्दै दायर भएको रिटमा आज सुनुवाइ हुदैछ ।
प्रधानमन्त्री तथा मन्त्रिपरिषद् कार्यालय, कानुन मन्त्रालय र संघीय संसद् सचिवालयलाई विपक्षी बनाई अधिवक्ताहरू किशोर पौडेल, जगन्नाथ दुलाल र अनुपम भट्टराईले सो बिहिबार रिट दायर गर्नुभएको थियो ।
रिटमा संसद्को अवधि समाप्त भइसकेपछि सभामुख र उपसभामुख पद पनि स्वतः रिक्त हुने जिकिर गरिएको छ ।
रिटमा समानुपातिकतर्फको बन्दसूची निर्वाचन आयोगमा बुझाउने अघिल्लो दिन नै सभामुख अग्नी सापकोटा र उपसभामुख पुष्पा भुसालको पदावधि सकिएको दाबी गरिएको छ ।
यसैगरी राष्ट्रपति विद्यादेवी भण्डारीले नागरिकता बिधेयक प्रमाणीकरण नगरेको विरुद्धको परेको रिटमा पनि आजै सुनुवाइ हुदैछ ।
अधिवक्ता सुनिलरञ्जन सिंह र सरिता थापाले सर्वोच्च अदालतमा दर्ता गराएको रिटमा राष्ट्रपति विद्यादेवी भण्डारीलाई समेत विपक्षी बनाइएको छ ।
नेपाल नागरिकता ऐन २०६३ लाई संशोधन गर्न बनेको विधेयक २०७९ लाई प्रमाणीकरण नगरी संविधानको गम्भीर उल्लंघन गरेको भन्दै राष्ट्रपति विद्यादेवी भण्डारी विरुद्धसमेत सर्वोच्च अदालतमा रिट दर्ता भएको हो ।
