काठमाडौं । दुबै सदनबाट पारित भएको नागरिकता विधेयक राष्ट्रपति विद्यादेवी भण्डारीबाट प्रमाणित नभएपछि राजनीतिक उथलपुथल बढेको छ ।
सत्ता गठबन्धनले राष्ट्रपतिको विरोध गरिरहेका छन् भने यसैबीच उपराष्ट्रपति नन्दबहादुर पुनले समेत आफनो धारणा व्यक्त गर्नुभएको छ ।
उपराष्ट्रपतिले बुधवार वक्तव्य जारी गर्दै संविधानको प्रमुख पालक र संरक्षकबाट नै सचेततापूर्वक संविधानको पालन र संरक्षण हुन नसकेको भनी वृहत जनआवाज उठिरहेको जनाउनुभएको छ ।
यसप्रकारको अवाज उठ्ने परिस्थितिको सिर्जना हुनु ज्यादै दुःखद रहेको बताउँदै संविधानको पालना र संरक्षणको जिम्मेवारीमा रहेकाहरुलाई संविधानको दायराभन्दा बाहिर जाने छुट नरहेको प्रतिक्रिया दिनुभएको छ ।
उहाँले वक्तव्यमार्फत भन्नुभएको छ –
सार्वभौम संविधान सभाबाट नेपालको संविधान २०७२ जारी भएको नेपाली इतिहासकै स्वर्णिम दिन संविधान दिवस यहीं असोज ३ गते हर्षोल्लासका साथ मनाएका छौं । यस सुनौलो दिनको अवसरमा हामी सबैले संविधानको पालन र संरक्षण गर्ने प्रतिबद्धता पनि दोहोऱ्याएका छौं ।
संविधानको पालना गर्नु प्रत्येक व्यक्तिको कर्तव्य हो संविधान बमोजिम सबैबाट आ-आफ्नो कर्तव्य पालना गर्नुका साथै संविधानको पालन र संरक्षण हुनुपर्दछ । पछिल्ला दिनमा विकसित घटनाक्रमले संविधानको प्रमुख पालक र संरक्षकबाट नै सचेततापूर्वक संविधानको पालन र संरक्षण हुन नसकेको भनी बृहत् जनआवाज उठिरहेका छन् । यो आवाज उठ्ने परिस्थितिको सिर्जना हुनु ज्यादै दुःखद पक्ष हो ।
संविधानको पालन र संरक्षणको जिम्मेवारीमा रहेकाहरुलाई संविधानको दायरा भन्दा बाहिर जाने छुट छैन । संविधान दिवसमा गरेको प्रतिबद्धतालाई स्मरण गर्दै संविधानको पालन र संरक्षणका लागि म सबै पक्षमा आग्रह गर्दछु ।
