एजेन्सी । भारतको अहमदाबादमा भवनको लिफ्ट खसेर ७ जनाको मृत्यु भएको छ भने एक जना गम्भीर घाइते भएका छन् ।
बुधबार बिहान करिब ९ः३० बजे दुर्घटना भएको हो । जानकारीका अनुसार भवनको नवौं तल्लामा काम भइरहेको र कामदारले लिफ्टबाट सामान माथि लैजाँदै गरेका थिए । यसैबीच सातौं तल्लामा पुग्दा लिफ्ट बिग्रियो । लिफ्टमा जम्मा ८ जना मजदुर थिए ।
अहमदाबाद नगरपालिकाको स्थायी समितिका अध्यक्ष हितेश बारोटले दुर्घटनापछि निर्माणाधीन भवनमा सुरक्षा मापदण्डको ख्याल नगरिएको बताएका छन् । लिफ्ट जसबाट सामान मात्रमाथि पठाइन्छ तर, त्यसमा रहेका सामानसँगै मजदुर पनि माथि–माथि पठाउने काम भइरहेको छ । निर्माणाधीन भवनको मापदण्डअनुसार यो गलत रहेको छ । यसका लागि निर्माण स्थलको मालिकलाई जिम्मेवार मानिनेछ ।
दुर्घटनाग्रस्त भवन गुजरात विश्वविद्यालय नजिकै निर्माण भइरहेको छ । यसको नाम एस्पायर–२ रहेको छ । यहाँ खसेको लिफ्ट निर्माण सामग्री बोक्न प्रयोग गरिएको थियो । फलामको संरचनामा राखिएको यस्तो लिफ्टलाई एलिभेटर भनिन्छ ।
