काठमाडौँ । गृहमन्त्री बालकृष्ण खाँणले नागरिकता विधेयकमा अस्वीकृत भइसकेको संशोधनबारे छलफल गर्न उपयुक्त नहुने बताउनुभएको छ ।
विधायन व्यवस्थापन समितिमा सोमबार भएको छलफलमा उहाँले नागरिकता विधेयक स्वीकृत गर्दा अस्वीकृत भइसकेको संशोधनमा छलफल गरिरहनु उपयुक्त नहुने बताउनुभएको हो ।
बैठकमा प्रमुख प्रतिपक्षी दल नेकपा (एमाले) का सांसदहरुले नागरिकता विधेयकबारे सरकारको धारणा आएपछि आफूहरुलाई सहज हुने बताएका थिए ।
राष्ट्रियसभा सदस्य विमला राई पौड्यालले अहिले फिर्ता आइसकेपछि पहिले हालेको संशोधन के हुन्छ भनी प्रश्न गर्दै छलफल गर्न मिल्छ भने संशोधनकर्तालाई बोलाउनुपर्ने बताउनुभयो ।
गृहमन्त्री खाँणले राष्ट्रपतिको पत्रको सम्मान गरेको बताउनुभयो । उहाँले हाम्रो संसदीय अभ्यासमा विधेयक प्रमाणीकरणका लागि पठाएपछि संदेशसहित फिर्ता आउनु स्वाभाविक प्रक्रिया भएको भन्दै यसैलाई सरकारले सम्मान गर्न चाहेको बताउनुभयो ।
उहाँले नागरिकता विधेयक स्वीकृत गर्दा अस्वीकृत भइसहेको संशोधनमाथि छलफल नहुने बताउनुभयो । उहाँले राष्ट्रपतिले पठाएको सन्देशमाथि नै छलफल गर्न उपयुक्त हुने धारणा राख्नुभयो ।
फोटो- रासस
