काठमाडौं । नेकपा एमालेको फुटको असर देशभरी देखिएका बेला प्रदेश( १ मा नेताहरु तानातान नै बनेको छ । प्रदेश १ मा मुख्यमन्त्री बन्ने दौडमा रहेका एमाले सचिव भीम आचार्यले नेकपा (एकीकृत समाजवादी) मा जाने सम्भावना भएका सांसदलाई मन्त्री बनाउने आश्वासन दिँदै आएका उदयपुरकी एमाले सांसद सुनिता चौधरीले पुष्टि गरेको हुन् ।
सांसद चौधरी नेकपा एकीकृत समाजवादीका अध्यक्ष माधवकुमार नेपालनिकट हुन्। उनका अनुसार उनीहरूको समूहका अधिकांशलाई केही दिनयता निरन्तर मन्त्री वा संसदीय समितिको सभापतिको अफर आइरहेको छ।
.‘पदको लोभमा परेर राजनीतिक अभियानबाट अलग हुने कुरै आउँदैन,’, उनले भनिन्।
मोरङकै अर्का एक सांसदले पनि मन्त्रीको अफर आएको स्वीकारे पनि त्यस्तो अफरलाई सामान्य भएको भन्दै आफूलाई मिडियामा ल्याएर विवादमा नतान्न उनले आग्रह गरेका हुन् ।
तीन दिनअघिसम्म मुख्यमन्त्री बन्न हच्किरहेका भीम आचायले बुधबार साँझ भने आफैं पार्टी अध्यक्ष केपी शर्मा ओलीको निवास बालकोट पुगेर तत्कालै मुख्यमन्त्री बनाइदिन आग्रह गरेको स्रोतको भनाइ छ ।
मुख्यमन्त्री बनेपछि मन्त्री र संसदीय समितिको सभापति फेरबदल गर्ने र नेपाल समूहका सांसदलाई एमालेमै टिकाउने वचन आचार्यले ओलीलाई दिएका हुन्। ओलीसँगको आचार्यको भेटपछि नै मुख्यमन्त्री शेरधन राईले राजीनामा दिने र आचार्यलाई अघि सार्ने तयारी एमालेभित्र भएको हो।
