अमेरिकी राष्ट्रपति जो बाइडेनले रुसी राष्ट्रपति भ्लादिमिर पुटिनको विशेष सैन्य कारबाहीको घोषणाप्रति प्रतिक्रिया व्यक्त गर्दै यसलाई ‘अकारण र अनुचित’ भनेका छन्।
रुसी राष्ट्रपतिको घोषणाको प्रतिक्रिया दिँदै बाइडेनले भने, “पूरा विश्वको प्रार्थना युक्रेनका जनतासँग छ।” आफ्नो सम्बोधनमा उनले रुसी राष्ट्रपतिलाई दोष दिँदै भने, “राष्ट्रपति पुटिनले पूर्व–व्यवस्थित युद्ध छनोट गरेका छन् जसले मानिसहरूलाई मार्नेछ र मानव त्रासदी निम्त्याउँछ।”
“यस युद्धबाट हुने मृत्यु र विनाशका लागि रुस एक्लै जिम्मेवार हुनेछ”, उनले भने।उनले अमेरिका र उसका सहयोगीहरु एकजुट भएर यस हमलालाई निर्णायक रुपमा जवाफ दिने बताए । उनले यो युद्धका लागि रुस मात्रै जवाफदेही हुने बताए ।
राष्ट्रपति बाइडेनले आज जी–७ का सदस्य राष्ट्रहरूसँग बैठक बस्ने र त्यसपछि मात्र रुसका सम्बन्धमा थप कदम चाल्ने जानकारी दिए ।
युक्रेनलाई गाभ्ने कुनै योजना छैन– पुटिन
रुसी राष्ट्रपति भ्लादिमिर पुटिनले बिहीबार बिहान टेलिभिजनमार्फत देशका नाममा सन्देश दिँदै रुसको युक्रेनलाई गाभेको कुनै योजना नभएको बताए ।विशेष सैन्य कारबाहीको घोषणा गर्दै पुटिनले युक्रेनका जनताले आफ्नो देश कसले चलाउने भन्नेबारे छनोट गर्न सक्ने बताए ।
बिहीबार टेलिभिजन सम्बोधनमा रुसी राष्ट्रपति पुटिनले युक्रेनी सेनालाई आत्मसमर्पण गर्न आग्रह गरे ।उनले पूर्वी युक्रेनमा तैनाथ सैनिकहरूलाई हतियार छोडेर घर फर्कन भनेका थिए।
उनले युक्रेनलाई चेतावनी दिँदै यदि युक्रेनी सेनाले हतियार नत्यागे सबै रगतको लागि जिम्मेवार हुने बताए।रुसका राष्ट्रपतिले आफ्नो सम्बोधनमा न्याय र सत्य रुसको पक्षमा रहेको बताए । उनले रुसविरुद्ध कसैले कारबाही गरेमा मस्कोले प्रतिक्रिया दिन ढिला नगर्ने चेतावनी दिए ।
युक्रेनविरुद्धको कारबाही ‘आत्मरक्षा’ भएको उनको भनाइ थियो। बिबिसीको सहयोगमा
