एजेन्सी । फ्रेन्च फुटबल लिग, लिग वान अन्तर्गत पेरिस सेन्ट जर्मेन (पिएसजी)ले रेइम्सलाई पराजित गरेको छ । गएराति रेइम्सको मैदानमा भएको खेलमा पिएसजीले २-० गोल अन्तरले जित निकालेको हो । पिएसजीको जितमा दुबै गोल किलियन एम्बाप्पेले गरे । उनले खेलको १६ औं र ६३ औं मिनेटमा गोल गर्दै पिएसजीलाई महत्वपूर्ण ३ अंक दिलाए । यता यसै खेलबाट अर्जेन्टिनी स्टार लियोनल मेसीले डेब्यु गरेका छन् ।
दोस्रो हाफमा मैदान प्रवेश गर्दै मेस्सीले डेब्यु गरेका हुन् । उनले राइम्सको मैदानमा उपस्थित दर्शकसामु ६६ औं मिनेटमा ब्राजिलियन स्टार नेयामारको स्थान लिँदै पिएसजीबाट पहिलो खेल खेले । मेसीले यसअघि स्पेनीस क्लब बार्सिलोनाबाट मात्रै व्यावसायिक फुटबल खेलेका थिए । यो जितसँगै पिएसजीले लगातार ४ खेलमा अपराजित यात्रा कायम राखेको छ । पिएसजी ४ खेलबाट १२ अंक जोड्दै तालिकाको शीर्षस्थानमा छ ।
