काठमाडौँ । मंगलबार राति परेको भीषण वर्षाका कारण नुवाकोटमा ठूलो क्षति भएको छ । वर्षाका कारण धानखेत, पक्की पुल र जलविद्युत् संरचनामा क्षति पुगेको छ । काठमाडौँ आउने छोटो मार्ग ढिकुरे–छहरे–गर्जेभन्ज्याङ–टोखा जाने सडकमा क्षति पुग्दा सवारी साधनको आवागमन हुन सकेको छैन ।
ढिकुरेबजारदेखि केही पर तादीखोलमा रहेको पक्की पुलको ढिकुरेबजारतिरको भागमा जाली हालेर बनाइएको सडक कटान भएपछि सडक अवरुद्ध भएको छ । त्यस्तै तादी र पञ्चकन्या गाउँपालिका जोड्ने आँप्रको पक्की पुल पनि वर्षाले क्षतिग्रस्त भएको छ ।
दुप्चेश्वर गाउँपालिका–रावतबेँसीमा बाढी र पहिरोले सिम्ले र कसेरी खेत नष्ट भएको बताइएको छ । सूर्यगढी गाउँपालिका–५ को खारेखोलाले माछापोखरी आउने सिँचाइ कुलो र वरपरका खेत बगाएको समाचार छ ।
त्यस्तै तादीखोलामा निर्माण भएको बुद्धभूमि हाईड्रोपावरमा बाढी परेका तीन कामदारको उद्धार गरिएको छ । उनीहरु हाइड्रोपावरको सुरक्षाका लागि बसेका थिए । भीषण वर्षासँगै तादीखोलामा बाढी आएपछि उनीहरु बीचमा रहेको सुरक्षित स्थानमा बसेका थिए । तर दुवैतिर खोलाको बाढीले वारिपारि जान नसकेपछि आज बिहान उनीहरुको सकुशल उद्धार गरिएको छ । हाइड्रोपावरको बाँधमा बाढीले क्षति पुर्याएको बताइएको छ ।
फोटो-सञ्जीब अधिकारी
