काठमाडौँ । एक चीन सिद्धान्त र ‘ताइवान स्वतन्त्रता’ को कडा विरोधप्रति चीनले नेपालको दीर्घकालीन प्रतिबद्धताको उच्च प्रशंसा गरेको छ । अमेरिकी सभामुख न्यान्सी पेलोसीको ताइवान भ्रमणले चीन र अमेरिकाबीच सम्बन्ध तनावको शिखरमा पुगेसँगै नेपालस्थित चिनियाँ राजदूत होउ यान्छीले बुधबार विज्ञप्ति जारी गरी ताइवान मामिलामा नेपालको प्रतिबद्धता स्मरण गराउनुभएको हो ।
विज्ञप्तिमा राजदूत यान्छीले यो नेपाल–चीन सम्बन्धको राजनीतिक आधार भएको स्पष्ट पार्दै नेपाल सरकार नेपाली जनताले एक चीन सिद्धान्तको पालना गरिरहने, चीनको वैध र न्यायपूर्ण अडानलाई बुझेर समर्थन गर्ने र एकअर्काको सार्वभौमसत्ता, सुरक्षा र क्षेत्रीय अखण्डताको रक्षा गर्ने चीनको प्रतिबद्धतालाई साथसाथै काम गर्ने उल्लेख गर्नुभएको छ ।
उहाँले चीन र नेपाल हिमाल र नदीका असल छिमेकी, भरपर्दो मित्र र भरपर्दो साझेदार हुन् भन्दै दुई देशले सार्वभौमसत्ता, सुरक्षा र क्षेत्रीय अखण्डतासँग सम्बन्धित प्रमुख चासोका मुद्दाहरूमा सधैँ एकअर्कालाई बुझेका छन् र समर्थन गरेको बताउनुभयो ।
अमेरिकाले ताइवानलाई चीनबाट अलग बनाउन खोजेको चीनले आरोप लगाउँदै आएको छ । सो प्रयासमा अमेरिकाले नेपाल जस्तो सानो मुलुकको पनि समर्थन खोज्न प्रयत्न गर्ने चीनको आशंका छ । यदि नेपालले अमेरिकी रणनीतिमा समर्थन जनाए त्यसबाट चीनको रणनीतिक सुरक्षा स्वार्थमा ठेस पुग्ने चीनको धारणा छ । त्यसैले ‘स्वतन्त्र ताइवान’ को विरोध नै नेपाल–चीन सम्बन्धको राजनीतिक आधार रहेको राजदूत यान्छीले स्पष्ट गर्नुभएको हो ।
