काठमाडौं । नेकपा (एमाले)का अध्यक्ष केपी शर्मा ओलीले सरकारको व्यवहार देखेर गोरु मात्र होईन अरु जनावर पनि लजाएको टिप्पणी गर्नुभएको छ । तुलसीलाल अमात्यको २५ औँ स्मृति दिवसका अवसरमा आयोजित एक समारोहमा बोल्दै अध्यक्ष ओलीले यस्तो बताउनु भएको हो ।
बजेट निर्माणमा अनाधिकृत व्यक्तिको प्रवेश गराउने व्यक्तिलाई पुनः अर्थमन्त्री बनाएर रमिता देखाएको उहाँले आरोप लगाउनु भयो । उहाँले भन्नुभयो ‘न स्वतन्त्र रुपमा छानबिन गर्न दिएको छ , न कल डिटेल हेर्न दिईएको छ । कुन समितिले सफाई दिएको छ र सफाई पाईयो भन्दै कुर्लदै हिँडिरहेका छन् , गठबन्धनसँग अर्को मान्छे पनि छैन रहेछ उहि मान्छे नै फेरि मन्त्री बनाए ।’
नेपाली कांग्रेसप्रति निकै आक्रामक बन्नुभएका ओलीले भन्नुभयो ‘के आधारमा काँग्रेसलाई लोकतान्त्रीक शक्ति भन्ने ? न चरित्र लोकतान्त्रकि छ न व्यवहार ।’ अध्यक्ष ओलीले गठबन्धनमा रहेका अन्य दलहरुलाई समेत सधैँ झै कटाक्ष गर्नुभयो ।
उहाँले भन्नुभयो ‘यो देश लुट्ने विकास बिरोधी गठबन्धन हो ।’ पूर्वसहकर्मीहरु प्रति पनि ओलीले कटाक्ष गर्न छाड्नुभएन । उहाँले भन्नुभयो ‘केही दिन अघि पाँच भाई जम्मा भए रे । एमालेमा छँदा दुख दिने पार्टी फुटाउनेहरुले समाजवादी केन्द्र बनाउने रे । यी देश द्रोहीहरुले के को समाजवादीदी केन्द्र बनाउने । यी एमसीसी, एसपीपी लगायत सम्झोता गर्नेहरुले भन्दैमा समाजबादी केन्द्र हुन्छ ?’
