काठमाडौं । जनता समाजवादी पार्टीकी सांसद रेनुका गुरुङले आफ्नो घरको कम्पाउण्डभित्र बम पड्किएको भन्दै सुरक्षाको माग गरेकी छन् । मंगलबार संसद् बैठकमा बोल्दै उनले यस्तो माग गरेकी हुन् । उनले सोमबार राती ८ बजेतिर बम पड्किदा घरका सबैजना आतंकित भएको बताइन् ।
झ्यालबाट बाहिर हेर्दा दुईजना लोग्ने मानिस मोटरसाइकलमा गएको र अँध्यारो हुँदा आफूले नचिनेको उनको भनाइ छ। सांसद गुरुङले संघीय सांसद र कार्यपालिकाको सदस्य भएकाले आफू र आफ्नो परिवारको सुरक्षाको सुरक्षार्थ पूर्वराज्यमन्त्रीले पाउनुपर्ने अनिवार्य पीएसओको आजीवन व्यवस्थाका लागि सभामुखमार्फत गृहमन्त्री र नेपाल सरकारसँग माग गरिन् ।
‘हिजो बेलुकी ८ः२५ बजे मेरो घरको गेटभित्र बम पड्काइयो, घरका सबै आतंकित भए, झ्याल खोलेर हेरेँ, दुई जना लोग्ने मान्छे मोटरसाइकलमा गएको देखेँ तर अँध्यारो भएकाले चिन्न सकिन।’ उनले भनिन्,‘महाराजगञ्ज थानाको नम्बर खोजेर फोन गरेँ। गृहमन्त्रीको फोन उठेन।’
त्यसपछि आफूले उपसभामुख पुष्पा भुसाललाई फोन गरेको र उनीबाट सान्त्वना पाएको बताइन् ।
उनले भनिन्, ‘त्यसपछि माननीय उपसभामुख पुष्पा भुसाल दिज्जुलाई फोन गरेँ। शान्त्वना दिनुभयो । अन्तः संघीय सांसद र कार्यपालिकाको सदस्य भएकाले म र मेरो घर परिवारको सुरक्षाको सुरक्षार्थ पूर्वराज्यमन्त्रीले पाउनुपर्ने अनिवार्य पीएसओको आजीवन व्यवस्थाका लागि सभामुखमार्फत् गृहमन्त्री र नेपाल सरकारसँग माग गर्दछु।’
