काठमाडौँ । काठमाडौँको काभ्रेस्थलीमा एकै परिवारका चार सदस्य मृत भेटिएको घरमा चार पेजको ‘सुसाइड नोट’ फेला परेको छ । घटनास्थलमा फेला परेको ‘सुसाइड नोट’मा के लेखिएको छ भन्नेबारे प्रहरीले केही बताएका छैन ।
गोरखाको भीमसेन थापा गाउँपालिका–६ अश्राङ घर भई पदमसालमा बस्दै आएका दिनेश पाण्डेको परिवारका चार जना मृत भेटिएका हुन् । घरमा पाण्डेसहित श्रमती र छोराछोरी मृत फेला परेका हुन् ।
दिनेशलाई झुण्डिएको अवस्थामा प्रहरीले फेला पारेको छ । कोठाको भित्रबाट चुकुल लगाई पहिला श्रीमती, छोरा र छोरीको हत्या गरेर उनले आत्महत्या गरेको प्रहरीले प्रारम्भिक अनुसन्धानबाट पत्ता लागेको जनाएको छ । भित्र भुइँमा तीन जनाको शव लडेको र दिनेशको झुण्डिएको अवस्थामा फेला परेको थियो । युके जाने तयारीमा रहेकी सुनिताको शरीरका ७ भन्दा बढी स्थानमा चक्कु प्रहार गरेको देखिएको एक प्रहरी अधिकारीले जानकारी दिए ।
गोरखाको भीमसेन थापा गाउँपालिकास्थित आश्राङ घर भएका उनीहरुको पदमसालमा एक तले घर थियो भने घर नजिकै चोकमा फेन्सी पसल सञ्चालनमा थियो । स्थानीयवासीका अनुसार दम्पतीबीच बारम्बार झगडा हुने गरेको थियो ।
झगडाकै क्रममा श्रीमान् दिनेशले घर बेच्न खोजेपछि विवाद उग्र बनेको थियो । दम्पतीबीच घर बेच्ने कुरा नमिलेपछि श्रीमतीलाई थाहै नदिई दिनेशले घर बेच्न १० लाख बैना गरेको खुलेको छ । यस्तै सोही घर धितो राखेर बैंकबाट १८ लाख ऋण लिएको पनि प्रहरीले पत्ता लगाएको छ ।
माइती पक्षले छोरीलाई बेलायत पठाउने भनेर निर्णय गरेर श्रीमती सुनीताको भिसा पनि आइसकेको पाइएको छ। बेलायत जाने तयारी हुँदै गर्दा परिवार नै सखाप बनेको छ ।
