बुटवल । नेकपा (एमाले) का उपाध्यक्ष विष्णु पौडेलले वर्तमान गठबन्धन सरकारलाई मुलुकप्रति कुने चिन्ता नभएको बताउनुभएको छ । मदन भण्डारी स्पोर्ट्स एकेडेमी रुपन्देहीले राष्ट्रपति रनिङशिल्ड प्रतियोगिता २०७८/०७९ का विजयी खेलाडीहरूको सम्मानमा आइतबार आयोजना गरेको कार्यक्रममा पूर्वअर्थमन्त्री समेत रहेका नेता पौडेलले सत्ता गठबन्धनलाई मुलुकको चिन्ता भन्दा कसरी सत्ता जोगाउने भन्नेमात्र चिन्ता रहेको बताउनुभयो ।
वर्तमान सत्ता गठबन्धनमा राष्ट्रिय हितको रक्षा, मुलुकको विकास र समृद्धिको एजेण्डामा कुनै चासो नरहेको भन्दै यही गठबन्धन कायम रहेसम्म मुलुकका सबै क्षेत्र अस्तव्यस्त हुने उल्लेख गर्नुभयो । गठबन्धनकै कारण महँगी र भ्रष्टाचार बढेको उहाँको भनाइ थियो ।
उपाध्यक्ष पौडेलले एमालेले मात्र मुलुकलाई सही दिशा निर्देश गर्ने जिकिर गर्नुभयो । एमाले सरकारबाट हटेपछि मुलुकमा देखिएको बेथितिले पनि एमालेले मात्र सही ढंगले मुलुकको नेतृत्व गर्नसक्ने प्रष्ट भएको उहाँँको भनाइ थियो ।
