काठमाडाैंः
गृह मन्त्रालयले विकास आयोजना कार्यान्वयनमा असुरक्षा महसुस हुने तथा मित्रराष्टसँगको सम्बन्धमा नै आँच आउने कुनै पनि गतिविधि नगर्न सर्वसाधारण सबैसँग अनुरोध गरेको छ ।
पछिल्ला दिनहरुमा मित्रराष्टहरुको सहयोगमा संचालित विकास आयोजना, त्यहाँ कार्यरत कर्मचारी, विदेशी नागरिक र तिनको सम्पत्तिलाई लक्षित गरी प्रत्यक्ष वा परोक्ष रुपमा सञ्चार माध्यम र सामाजिक सञ्जालमा नकारात्मक टिकाटिप्पणी गर्ने, धम्कीपूर्ण अभिव्यक्ति दिने जस्ता गतिविधिहरु प्रति नेपाल सरकारको ध्यानाकर्षण भएको मन्त्रालयले जनाएको छ ।
आज साँझ गृह मन्त्रालयले जारी गरेको विज्ञप्तिमा भनिएको छ, त्यस्ता अभिव्यक्ति र गतिविधिहरुको मन्त्रालयले सूक्ष्म रुपमा निगरानी राख्ने, विश्लेषण गर्ने र त्यस्ता गतिविधि उपर प्रचलित कानुन बमोजिम कडा कारबाही गरिने छ ।
हालैका दिनहरुमा अमेरिकी सहयोगमा संचालनमा आउन लागेको विवादास्पद मिलेनियम च्यालेन्ज कर्पोरेसन (एमसीसी) को विषयलाई लिएर राजनीतिक दल एवं अन्य कतिपय व्यक्तिले सामाजिक संजाल मार्फत टिप्पणीहरु गरिरहेका छन् । खासगरी एमसीसीका उपाध्यक्षको नेपाल भ्रमणको पूर्वसन्ध्यामा एमसीसी लक्षित कडा टीकाटिप्पणी भइरहेका छन् ।
