काठमाडौं । नेकपा एमालेले सर्वोच्च अदालतमा निर्वाचन आयोग र सभामुख अग्निप्रसाद सापकोटाविरुद्ध दायर गरेको रिट निवेदन ‘हेर्न नभ्याइने’मा परेको छ ।
आइतबार रिट निवेदनमाथि सुनुवाइका लागि प्रधानन्यायाधीश चोलेन्द्र शमशेर जबराको एकल इजलासमा पेसी तोकिए पनि ‘हेर्न नभ्याइने’ सूचीमा राखिएको हो ।
एमालेले गत बुधबार सर्वोच्च अदालतमा तीनै वटा मुद्धा दायर गरेको थियो । एमालेले निर्वाचन आयोग, सभामुख अग्नि सापकोटा र लुम्बिनी प्रदेशका सभामुख पूर्णबहादुर घर्ती विरुद्ध रिट निवेदन दायर गरेको थियो ।
पार्टीबाट कारवाही गरिएका १४ सांसदलाई आयोगले दल दर्ता गर्न मान्यता दिएको, सभामुख सापकोटाले एमाले सांसदहरुको सूचना टाँस नगरेको र लुम्बिनी प्रदेशका सभामुखले पनि प्रदेश सांसदहरुलाई कारवाही गरेको सूचना टाँस नगरेको भन्दै एमाले सर्वोच्च गएको हो ।
