काठमाडौँ । बजेट निर्माणमा अनधिकृत व्यक्तिको संलग्नता विषयमा गठित विशेष संसदीय छानबिन समितिको समयसीमा थप्ने तयारी भएको छ । समितिको समयसीमा बिहीबार सकिँदैछ ।
छानबिनमा १० दिनको समय अपुग भएका भन्दै समितिका सभापति लक्ष्मणलाल कर्णले समयसीमा थपको प्रक्रिया अघि बढाइएको बताउनुभयो ।
छानबिनको निम्ति अझै काम बाँकी रहेको भन्दै उहाँले छानबिनलाई निष्कर्षमा पुर्याउन आवश्यक समय थपका लागि सभामुखसमक्ष आग्रह गरिएको जानकारी दिनुभयो ।
समयसीमा थपका लागि समितिको सिफारिस अनुसारको प्रस्ताव सभामुखले संसद्मा निर्णायार्थ पेश गर्नुपर्नेछ। संसद्ले प्रस्ताव पारित गरेपछि समितिको म्याद थप हुनेछ।
समितिले बिहीबार बिहानसम्म कर्मचारी, पत्रकार र पूर्वअर्थमन्त्री जनार्दन शर्मासँग छलफल गरिसकेको छ । समितिले अर्थ मन्त्रालयका सचिवद्वय मधुकुमार मरासिनी र कृष्णहरि पुष्करलगायतका कर्मचारी र करको दर हेरफेरका लागि अनधिकृत व्यक्तिलाई मन्त्रालय प्रवेश गराएको भन्ने समाचार लेख्ने पत्रकारसँग समितिले छलफल गरिसकेको छ ।
