काठमाडौँ । सरकारले अमेरिकासँगको स्टेट पार्टनरसीप प्रोग्राम (एसपीपी) सम्बन्धमा पत्राचार गर्नेबारे अझै अध्ययन भइरहेको बताएको छ ।
बुधबार परराष्ट्र मन्त्रालयमा आयोजित पत्रकार सम्मेलनमा मन्त्रालयले एसपीपीअन्तर्गत केही सहयोग यसअघि नै आइसकेको भन्ने तथ्यहरु देखिएको भन्दै कहाँ र कसरी त्यस्ता सहयोग आए भन्नेबारे टुंगोमा पुगेर मात्र पत्राचार गरिने बतायो ।
मन्त्रालयका प्रवक्ता सेवा लम्सालले एसपीपीका बारेमा अध्ययन भइरहेको उल्लेख गर्दै भन्नुभयो, “विपद् व्यवस्थापनलगायत के केमा सहयोग प्राप्त भएको हो त्यसको अध्ययन गरेर उपयुक्त समयमा पत्राचार गरिने छ ।”
सरकारले एसपीपीलाई अघि नबढाउने निर्णय गरेको थियो । प्रवक्ता लम्सालले प्रधानमन्त्री शेरबहादुर देउवाको अमेरिका भ्रमण कहिले हुने भन्नेबारे सुनिश्चित नभएको जानकारी दिनुभयो । उहाँका अनुसार पहिला एउटा मितिमा कुरा भइरहेको भए पनि अब दुवै पक्षको सहमतिमा मितिको टुंगो लाग्नेछ ।
उहाँले संयुक्त राष्ट्रसंघको आगामी महासभाको बैठकमा नेपालबाट पनि उच्च तहकै टोली जाने तयारी भएको बताउनुभयो । महासभामा सहभागिता जनाउन मन्त्रिपरिषद्ले उच्च तहमा कुन व्यक्ति हुने भन्ने टुंगो लाग्ने उहाँले बताउनुभयो ।
