एजेन्सी । फ्रान्सको राष्ट्रिय फुटबल टोलीका पूर्वखेलाडी जीन पिएर आडम्सको ७३ वर्षको उमेरमा मृत्यु भएको छ। उनको ३९ वर्ष लामो कोमापछि मृत्यु भएको हो ।
शिक्षणका क्रममा घाइते भएका आडम्सको शल्यक्रियाको दिन अस्पतालका धेरै कर्मचारीहरू हडतालमा थिए।
उनको शल्यक्रिया त भयो तर एनस्थीजीया दिन खटिएका एक चिकित्सकले आठजना बिरामी हेर्नुपर्ने अवस्था आइपरेको थियो।
ती चिकित्सकले एक प्रशिक्षार्थी चिकित्सकको सहायता लिए। ती प्रशिक्षार्थी चिकित्सकले पछि 'आफूलाई दिइएको जिम्मेवारी वहन गर्न नसक्ने अवस्थामा भएको' बताएका थिए।
एनस्थीजीया दिने चिकित्सक र प्रशिक्षार्थी चिकित्सकका केही गल्तीका कारण आडम्सलाई हृदयाघात भयो र उनको मस्तिष्कमा पनि असर गर्यो।
सन् १९८२ को मार्चमा घुँडाको शल्यक्रियाका लागि अस्पताल भर्ना भएका आडम्स अचेत बनाउन प्रयोग गरिने औषधिको मात्रा नमिलेकाले त्यसपछि कहिल्यै चेतनामा आएनन्।
सेनगलमा जन्मिएका उनले नीस र पीएसजी क्लबका लागि रक्षकका भूमिकामा १४० भन्दा बढी खेल खेलेका थिए। दुवै क्लबले उनको मृत्युपछि वक्तव्य जारी गरेका छन्।
आडम्सले फ्रान्सका लागि सन् १९७२ देखि १९७६ सम्म २२ वटा अन्तर्राष्ट्रिय खेल खेलेका थिए।उनले नीम क्लबका लागि ८४ वटा खेल खेलेका थिए। उक्त क्लबले पनि वक्तव्यमा प्रकाशित गरेर शोक प्रकट गरेको छ।
सन् १९९० को दशकको मध्यतिर दुवै चिकित्सकलाई सो गल्तीका लागि एक महिनाको निलम्बन र ७५० यूरो जरिवानाको सजाय दिइएको थियो।
