काठमाडौँ । नेपाली कांग्रेसका महामन्त्री गगन थापाले प्रधानमन्त्रीमा दाबी गरे आफ्नो समर्थन रहने अर्का महामन्त्री विश्वप्रकाश शर्माले बताएका छन् ।
अहिले महामन्त्री शर्मा अमेरिका भ्रमणमा छन् । कांग्रेस निकट जनसम्पर्क समितिले क्यालिफोर्नियामा आयोजना गरेको कार्यक्रममा महामन्त्री शर्माले सांसद र मन्त्रीसमेत भइसकेका गगन थापाले प्रधानमन्त्रीमा दाबी गर्नु स्वाभाविक रहेको बताए ।
५० वर्षमुनिको उमेर समूहबाट प्रधानमन्त्रीमा गगन थापाले दाबी गर्नु स्वाभाविक भएको भन्दै उनले यसमा आफूहरुबीच जुनियर र सिनियरको कुरै नआउने बताए ।
महामन्त्री थापाले आगामी प्रतिनिधिसभाको निर्वाचनपछि प्रधानमन्त्रीमा दाबी गर्ने बताउँदै आएका छन् । प्रधानमन्त्री बन्न कांग्रेसमा संसदीय दलको नेता बन्नुपर्ने भएकाले थापाले आगामी प्रतिनिधिसभाको निर्वाचनमा उम्मेदवारी दिने बताउँदै आएका छन् ।
