काठमाडौ । ४,३८० मिटरको उचाईमा रहेको गोसाइँकुण्ड हिन्दू, बौद्ध र बोन्पो (तान्त्रिक) धर्मावलम्बीहरुको महत्वपूर्ण तीर्थस्थल हो । हिन्दूले देवाधिपती महादेव मानेर पुज्छन् भने बौद्धले आर्य अवलोकितेश्वर मान्छन्। तामाङ समुदाय भने जनैपूर्णिमा (बदौ छेबा चोङ्ङा) मा झाँक्रीसहित पुजा गर्छन । धार्मिक दृष्टिले मात्र होईन प्राकृतिक रुपमा पनि निकै सुन्दर छ गोसाईकुण्ड ।
यति बेला प्रसिद्ध धार्मिक तथा पर्यटकिय क्षेत्र गोसाईकुण्डलाई हिउँले छपक्कै ढाकेको छ । हिउँदमा निलो देखिने दह पुरै हिँउले छोपेको छ । जाडोयाममा स्वरुप फेरेको गोसाँईकुण्ड दृश्यावलोकन गर्न लागि आन्तरिक तथा बाह्य पर्यटकहरु गोसाँईकुण्ड पुग्ने गरेका छन् । पदमार्ग बाट रमाउनेहरु रसुवा सदरमुकाम धुन्चे सम्म सबारी साधनमा अनि पैदल गोसाईकुण्ड पुग्ने गरेका छन् भने हेलिकप्टरचार्टर गरेर पुग्नेहरुको संख्या पनि उल्लेख रहेको छ ।
रसुवा जिल्लामा रहेको गोसाइँकुण्ड नीलो पानीको सरोवर पनि हो । भगवान शिवले विषको पीडा शान्त पारेको त्यही गोसाइकुण्डमा हो । यसका वरिपरि अरू १०८ वटा कुण्ड रहेका छन् । जसमध्ये एउटा पार्वती कुण्ड रहेको छ भने मुख्य गोसाइँकुण्डलाई चाहिँ शिवकुण्ड मानिन्छ ।
यहाँको प्राकृतिक वनावट र कुण्डहरूले नै यसलाई आकर्षक गन्तव्यस्थल बनाइदिएको छ । गोसाइँकुण्ड लाङटाङ राष्ट्रिय निकुञ्ज भित्र रहेको छ । यस ताललाई सन् २००७ सेप्टेम्बरमा रामसार क्षेत्र भित्र समावेश गरिएको छ ।
तस्वीर : ज्ञानेन्द्र न्यौपाने -रसुवा
