काठमाडौँ । साझा यातायातले आजदेखि बिजुली बस सञ्चालन गर्दैछ । साझाले नेपालमै पहिलो पटक सुविधासम्पन्न बिजुली बस सञ्चालन गर्न लागेको हो ।
हाललाई साझाले तीन वटा बिजुली बस सञ्चालन गर्ने भएको छ । रत्नपार्क, ठमेल, नयाँ बसपार्क हुँर्द एयरपोर्ट रुटमा दुई वटा र लगनखेल, रत्नपार्क हुँदै बूढानीलकण्ठ रुटमा एउटा बस सञ्चालन हुनेछ ।
साझाको बिजुली बस अपांगता भएकालाई पनि सहज हुने गरी बनाइएको छ । ह्विल चियरको सहयोगमा उनीहरु बसमा चढ्न र ओर्लन सक्नेछन् । बसभित्र पनि उनीहरुलाई छुट्टै सिटको व्यवस्था गरिएको बताइएको छ ।
कूल २६ सिट भएको बसमा उभिएर यात्रा गर्न परेको अवस्थामा ह्यान्डल बारको पनि व्यवस्था गरिएको छ । बसमा चालक, परिचालक, अपांगता र ज्येष्ठ नागरिकका लागि सिट छुट्याइएको छ ।
सिसिटिभी र टिभी जडान गरिएकाले बिजुली बसमा चोरी डकैती र पकेटमारको समस्या यात्रुहरुलाई हुनेछैन ।
वाइफाइको समेत सुविधा भएको बसमा फोहर व्यवस्थापनका लागि डस्टबिन पनि राखिएको छ । यात्रुलाई गन्तव्यमा पुगेपछि ओर्लनका लागि चालकलाई सूचना दिने विशेष बटमको सुविधा जडान गरिएको छ । आफ्नो गन्तव्य आएपछि यात्रुले सो बटमा थिचेर गाडीलाई रोक्न सक्नेछन् ।
