काठमाडौँ । नेपाली कांग्रेस र नेकपा (माओवादी केन्द्र) का सांसदहरुले वाग्मती प्रदेशका मुख्यमन्त्री परिवर्तन गर्न हस्ताक्षर संकलन सुरु गरेका छन् । प्रदेशसभाबाट बजेट पास भएपछि सत्तारुढ गठबन्धनबाटै मुख्यमन्त्री राजेन्द्रप्रसाद पाण्डेलाई परिवर्तन गर्न हस्ताक्षर संकलन सुरु भएको हो ।
प्रदेश मुख्यमन्त्री पाण्डेले केन्द्रको निर्देशनबिना सजिलै मुख्यमन्त्री पद नछोड्ने बताएपछि हस्ताक्षर संकलन सुरु गरिएको बताइएको छ । पूर्वसहमति अनुसार सत्तारुढ गठबन्धनमा आगामी चुनावी सरकारको नेतृत्व कांग्रेसले गर्नुपर्ने भन्ने थियो ।
सोही सहमतिअनुसार नेकपा (एकीकृत समाजवादी) बाट पाण्डे मुख्यमन्त्री भएका हुन् । उनी गत कात्तिक ११ गते छ महिना मुख्यमन्त्री रहने गरी कांग्रेस, माओवादी केन्द्र, जसपा र एकीकृत समाजवादीको समर्थनमा सत्तामा आएका हुन् । मुख्यमन्त्री बन्न उनको समर्थनमा माओवादी केन्द्रको २३, कांग्रेसको २२, एकीकृत समाजवादीको १३, र जसपाको एकसहित ५९ सांसद थिए ।
आगामी वर्षको बजेट पारित भएपछि कांग्रेस संसदीय दलका नेता इन्द्र बानियाँ अब मुख्यमन्त्री बन्ने पालो थियो ।
कांग्रेसले सहमति अनुरुप अब प्रदेशको नेतृत्व आफूले पाउनुपर्ने माग गरेको छ तर मुख्यमन्त्री पाण्डेले केन्द्रीय नेतृत्वको निर्देशनपछि मात्र मुख्यमन्त्री पद छाड्ने बताएका छन् । त्यसपछि हस्ताक्षर संकलन सुरु भएको हो ।
