काठमाडौं । नेकपा एमालेका अध्यक्ष केपी शर्मा ओलीले राष्ट्रिय धान दिवसको अवसरमा धान रोपाइँ गरेका छन् ।
भक्तपुरको सिरुटारमा अखिल नेपाल किसान महासंघले आयोजना गरेको रोपाइँ महोत्सवमा श्रीमती राधिका शाक्यसँगै ओलीले मेसिनबाट धान रोपेका हुन् ।
ओलीले धान रोपाइँ गरेपछि महोत्सवमा सहभागीहरुले पनि धान रोपेका थिए । असारे भाका गाउँदै महासंघ सदस्यहरुले धान रोपाइँ गरेका थिए ।
महोत्सवमा ओलीले भने, ‘प्लटिङ सिस्टमले गर्दा जथाभावी बस्ती बसालिएको छ, र कहाँ बस्ती, कहाँ खेती भन्ने गोलमाल भइराखेको छ ।’
नेपालको भूबनोटअनुसार उपयुक्त हुने भएकाले धानबालीमा जोड दिनुपर्ने बताउँदै धानको व्यवसायीकरण गर्दै उत्पादन र उत्पादकत्व बढाउनुपर्ने ओलीको भनाई छ ।
