काठमाडौं । नेकपा (एमाले) का सचिव योगेश भट्टराईले उबेला पार्टी विभाजनको औचित्य छैन भनी माधवकुमार नेपाललाई दिएको तर्क अहिले नेकपा (एकीकृत समाजवादी) मा देखिएको अवस्थाले पुष्टि गरेको बताउनुभएको छ ।
उहाँले अहिले नेकपा (एकीकृत समाजवादी) भित्र देखिएको विवादबारे सामाजिक सञ्जालमार्फत सो टिप्पणी गर्नुभएको हो ।
एकीकृत समाजवादीबाट सरकारमा सहभागी भएका मन्त्रीहरुले पार्टी अध्यक्ष नेपाललाई संसदीय दलको नेताबाटै हटाउने र सम्भव भए पार्टी नै विभाजन गर्ने गरी चुनौती दिएपछि एमाले सचिव भट्टराईको सो टिप्पणी आएको हो ।
पार्टीको सचिवालय र स्थायी समितिको बैठकले सरकारमा सहभागी पार्टीका मन्त्रीहरुलाई फिर्ता बोलाएर नयाँ मन्त्रीको नाम सिफारिस गर्ने निर्णय गरेको भए पनि मन्त्रीहरुले सो निर्णयलाई चुनौती दिएका छन् । छ सांसदसहित चार मन्त्रीले पार्टी अध्यक्ष नेपाललाई ध्यानाकर्षण पत्र पठाउँदै पार्टीको निर्णय कुनै पनि हालतमा नमान्ने चेतावनी दिएका छन् ।
उनीहरुले संसदीय दलको बैठक बोलाउने माग गर्दै सम्भवतः दलका नेता नेपाललाई नै हटाउने अनुमान गरिएको छ ।
सचिव भट्टराईले सामाजिक सञ्जालमा आफूले पार्टी विभाजन नगर्न नेता नेपाललाई गरेको अनुनय, विनय र एमाले विभाजनको औचित्य छैन भनी दिएको तर्क अनि नेपालको कम्युनिस्ट आन्दोलनलाई तहसनहस पार्ने षड्यन्त्रको शिकार नबन्न गरेको अनुरोध र केहिभन्दा पनि वहाँले नमानेपछि कुनै दिन परिस्थिति तपाईंको काबुभन्दा बाहिर जानेछ भनेर वहाँबाट छुट्टिएको पलको स्मरण भइरहेको बताउनुभएको छ ।
“हेर्दै जाउँ हामीले त्यतिबेला नै चिनेका खेलाडीहरु कमरेड माधव नेपाल र कमरेड झलनाथ खनालले बिस्तारै चिन्दै जानुहुनेछ । आत्माबोध र पश्चाताप : सिर्फ कहिले ? ”, एमाले सचिव भट्टराईले भन्नुभएको छ ।
