काठमाडौं । सरकारले प्रतिस्थापन विधेयकमार्फत दुईपांग्रे सवारीसाधनको अन्तशुल्क र सडक कर बढाएको छ ।
यसबाट अब विदेशबाट आयातित मोटरसाइकल तथा स्कुटरहरुको भाउ वृद्धि हुने भएको छ ।
सवारीसाधनमा २७० प्रतिशत कर असुल्दै आएको सरकारले दुईपांग्रे सवारीसाधनमाथिको अन्तशुल्क र सडक कर बढाएको हो ।
अर्थमन्त्री जनार्दन शर्माले अघिल्लो सरकारले ल्याएको बजेट अध्यादेश खारेज गर्दै ल्याएको प्रतिस्थापन विधेयकमा कर थप गरेका हुन् ।
अब १२५ सीसीदेखि १५५ सीसीसम्मका मोटरसाइकल मूल्य बढेर आउने भएका छन् । १२५ भन्दा माथि र १५५ सीसीसम्मका दुईपांग्रे सवारीसाधनको सडक दस्तुर प्रतिगोटा ३ हजार बढाइएको छ ।
वर्तमान सरकारले विधेयकमार्फत १२५ सीसी ननाघेका मोटरसाइकलमा ४० प्रतिशत अन्तशुल्क तोकेको छ । १२५ देखि २०० सीसी सम्मको बाइकलाई १० प्रतिशत अन्तशुल्क वृद्धि गरेर ५० प्रतिशत पुर्याएको छ ।
२०० सीसीदेखि २५० सीसी सम्मका मोटरसाइलकमा ६० प्रतिशत अन्तशुल्क लाग्ने व्यवस्था गरिएको छ ।
५०० देखि ८०० सीसीसम्मका मोटरसाइकलमा ८० प्रतिशत अन्तःशुल्क लाग्दै आएकोमा बढाएर १०० प्रतिशत यो सरकारले पुर्याएको छ ।
यस्तै अन्तशुल्क वृद्धि नभए पनि नेपालमा नै एसेम्बल भएका सवारीसाधनमा ३ हजार रूपैयाँ सडक दस्तुर शुल्क भने बढ्ने छ । बढेको सडक दस्तुरका कारण उपभोक्तालाई केही भार थपिनेछ ।
