काठमाडौँ । प्रतिनिधिसभा, अन्तर्राष्ट्रिय सम्बन्ध समितिले अमेरिकाको स्टेट पार्टनरसीप प्रोग्राम (एसपीपी) सम्बन्धमा औपचारिकरुपमा निर्णय पेस गर्न सरकारलाई निर्देशन दिएको छ ।
शुक्रबार बसेको समितिको बैठकले सरकारको निर्णय मौखिक नभई लिखित निर्णयका रुपमा आउनुपर्ने समेत निर्देशन दिएको छ । समितिका सभापति पवित्रा निरौला खरेलले एसपीपीका सन्दर्भमा अहिलेसम्म भएका पत्राचार तथा कागजातहरू एक साताभित्र समितिमा पेस गर्न निर्देशन दिएको बैठकको निर्णय सुनाउनुभयो ।
त्यस्तै बैठकले प्रधानमन्त्री शेरबहादुर देउवाको आसन्न अमेरिका भ्रमणबारे पनि प्रश्न उठेको भन्दै यही असार ५ गतेको बैठकमा सोसम्बन्धमा जवाफ दिन प्रधानमन्त्रीलाई बोलाउने निर्णय गरेको छ ।
बैठकमा तत्कालीन केपी शर्मा ओली नेतृत्वको सरकारका पालामा परराष्ट्र सचिवको संयोजकत्वमा कार्यदल बनेको र त्यसले एसपीपीमा जाने भन्ने कुरा स्थगन गरेको भनिएको भन्दै सोबारे यथार्थ विवरण पेस गर्न समेत निर्देशन दिएको छ ।
