काठमाडौं । प्रमुख प्रतिपक्ष दल नेकपा एमालेले बजेट निर्माणमा अनधिकृत व्यक्तिको संलग्नताका विषयमा छानबिन गर्न संसदीय समिति गठनको माग गरेको छ ।
बजेट निर्माणमा अनधिकृत व्यक्तिले हस्तक्षेप गरेको भन्दै संसदीय छानबिन समिति गठनको मागसहित एमालेले प्रतिनिधिसभाको बैठकमा अवरोध गरेको हो ।
मंगलबार प्रतिनिधिसभा बैठकमा नेकपा एमालेका संसदीय दलका प्रमुख सचेतक विशाल भट्टराईले संसदीय छानबिन गठन गर्नुपर्ने माग गरे ।
यो विषय सञ्चार माध्यममार्फत सार्वजनिक भइसकेपछि अर्थमन्त्रीले नैतिकताका आधारमा राजीनामा दिनुपर्ने सांसद भट्टराईले बताए ।
उनले जेठ १४ गते राति अर्थ मन्त्रालयमा बजेट निर्माण भइरहेको ठाउँको सीसीटीभी फुटेज सार्वजनिक गर्न समेत माग गरेका छन् ।
एमाले सांसदहरूले उठेर अवरोध जारी राखेपछि बैठक भोलि बिहान ११ बजेसम्मका लागि स्थगित भएको छ ।
