काठमाडौँ । नेकपा (माओवादी केन्द्र)का अध्यक्ष पुष्पकमल दाहाल प्रचण्डले आगामी मंसिरको पहिलो सातामा संघीय र प्रदेशसभाको निर्वाचन हुने बताउनुभएको छ । बर्दियामा आयोजना गरिएको पार्टीको कार्यक्रममा उहाँले सत्ता गठबन्धनमा रहेका दल र प्रमुख प्रतिपक्षी नेकपा (एमाले) सँग आगामी मंसिरमा निर्वाचन गर्नेसम्बन्धमा समझदारी बनेको बताउनुभयो ।
सत्ता गठबन्धनको एक प्रमुख घटक माओवादी केन्द्रका अध्यक्ष प्रचण्डका अनुसार कात्तिकको अन्तिम साता वा मंसिरको पहिलो साता निर्वाचन गर्नेबारे समझदारी भएको छ । उहाँले एकै चरण वा दुई चरणमा निर्वाचन गर्ने भन्नेबारे निर्णय भइनसेको जानकारी दिँदै यद्यपि एकै चरणमा निर्वाचन गर्ने सम्भावना रहेको बताउनुभयो ।
सुरक्षाका दृष्टिकोणले दुई चरणमा निर्वाचन गर्ने भन्ने कुरा आएको भन्दै उहाँले शान्तिपूर्ण, स्वच्छ र भयरहित वातावरणमा निर्वाचन सम्पन्न गर्न सबैले भूमिका निर्वाह गर्नुपर्ने उल्लेख गर्नुभयो ।
