काठमाडौं महानगर क्षेत्रमा केही समयदेखि फोहोर उठ्न सकेको छैन । शहरका चोक, गल्ली र मूल सडकमै फोहोरको डंगुर जताततै देख्न सकिन्छ ।
महानगरपालिकाले फोहोरको व्यवस्थापन गर्न नसकेको आक्रोस चुलिँदै गएसँगै महानगरको नयाँ नेतृत्व यसै विषयमा बढी केन्द्रित भएको छ । फोहोर व्यवस्थापनका विषयमा छलफल गर्न काठमाडौं महानगरपालिकाका प्रमुख बालेन्द्र साह र उपप्रमुख सुनिता डंगोल सिसडोल पुग्नु भएको छ ।
सहरी विकासमन्त्री रामकुमारी झाँक्रीसँगको भेटघाटपछि स्थानीयका समस्या र पूर्वाधार विकासबारे अध्ययन गर्न सिसडोल गएको उपप्रमुख डंगोलको भनाइ छ ।
यसअघि पनि प्रमुख साह चुनाव जितेलगत्तै सिसडोल जानु भएको थियो । त्यसबखत साहले फोहोरको दिगो व्यवस्थापनमा सरकारी पहल र प्रयास अत्यन्तै जोखिमपूर्ण र बेवास्ता गरिएको भनाइ राख्नु भएको थियो । प्रमुख साह र उपप्रमुख डंगोल एकैसाथ सिसडोल पुगेको यो पहिलो पटक हो ।
डम्पिङ साइटका कारण निकै समस्या झेल्नुपरेको भन्दै सिसडोलबासी समय समयमा आन्दोलित हुने गरेका छन् ।
