काठमाडौं । अबदेखि मौसम सफा नभए आन्तरिक उडान गर्न नपाइने भएको छ ।
नेपाल नागरिक उड्डयन प्राधिकरण(क्यान)ले मौसम सफा नभए आन्तरिक उडान गर्न नपाउने निर्णय गरेको हो ।
प्राधिकरणले तारा एयरको विमान दुर्घटना भएसँगै यस्तो निर्णय गरेको हो । क्यानका अनुसार अबदेखि उड्ने र पुग्ने स्थानको मौसम सफा हुनुपर्नेछ ।
दुबै ठाउँको मौसम सफा नभएको खण्डमा उडान अनुमति नदिइने क्यानले जनाएको छ ।
अहिलेसम्म विमान उड्ने विमानस्थल र विमान पुग्ने विमानस्थलको मौसम सफा भएमा उडान अनुमति दिँदै आएको थियो ।
अबदेखि भने इनरुट मौसम पनि सफा हुनुपर्ने निर्णय गरिएको हो । विमान उड्ने स्थान, विमान पुग्ने स्थान र उडानको बाटो समेतलाई इनरुट भनिन्छ ।
ती सबै स्थानको मौसम सफा नभएसम्म उडानको अनुमति नदिइने निर्णय प्राधिकरणले जनाएको छ । यो निर्णयले हवाई दुर्घटना कम गर्न मद्दत मिल्ने पनि क्यानको भनाई छ ।
यस्तो निर्णय भिएफआर (भिजुअल फ्लाइट रुल्स)बाट उडान गर्ने विमान र विमानस्थलका लागि मात्रै लागू हुनेछ । भिएफआर भन्नाले आँखाले हेरेर विमान उडाउने र ल्याण्ड गर्ने विधि हो ।
तर, आईएफआर (इन्स्ट्रुमेण्ट फ्ल्याइट रुल्स) विधि जडान भएको विमान र विमानस्थलमा भने यो नियम लागू नहुने प्राधिकरणले जनाएको छ ।
